Primavera en Danza leva a Carballo tradición e modernidade, identidade e hibridación

A primavera en Carballo (Bergantiños), anúnciase a ritmo de danza. O Pazo da Cultura prepárase xa para abrir as súas portas ao festival Primavera en Danza, que celebrará a súa 22ª edición do 12 ao 30 de abril cunha carteleira que inclúe seis citas coreográficas. O festival é un dos poucos na Galiza que aposta por achegarse á danza contemporánea, unha manifestación artística cuxa escasa presenza nos escenarios galegos non se corresponde coa súa alta capacidade de creación e innovación e repercusión das artes escénicas actuais. O programa deste ano inclúe tres compañías galegas -a de Paula Quintas, a de Marcia Vázquez e Nova Galega de Danza-, La Coja Dansa de Valencia, Led Silhouette de Nafarroa e Miguel Barrero y la pequeña Victoria Cen, de Castela e León. Marcia Vázquez abrirá o programa, o día 12, co seu espectáculo Vaivén, que a bailarina e coreógrafa define como "un paseo polas lembranzas de todo o que rodea á mar na Galiza: a dureza do traballo, a paisaxe, o Prestige, a personalidade de vivir a carón da costa". O vaivén do título refírese, por suposto, ao das ondas, cuxo movemento inspira o da obra. Vázquez iniciou o seu traballo dentro da danza urbana, decantándose logo polo contemporáneo. Vaivén é o seu primeiro espectáculo para sala e nel conflúe unha investigación sobre as ondas e as frecuencias, sobre a identidade individual e colectiva ou os ciclos emocionais. O día seguinte, 13 de abril, será Paula Quintas a que leve até Carballo o seu Multiperspectivas#2, un espectáculo que mestura improvisación teatral, danza e circo, deixando ademais un amplo espazo para a interacción co público. A obra parte dunha instalación que considera a perspectiva do espectador como reflexión contemporánea, buscando novos puntos de vista e, polo tanto, de reflexión. A proposta, creada con artistas de danza e de circo, trata o corpo, os obxectos, o tempo e o espazo como soportes das artes performativas, co seus límites e confluencias. Jaime Pablo Díaz: "A nosa tradición non ten nada que envexarlle á do flamenco" Tradición e modernidade O día 20 será a quenda de Berro, de Nova Galega de Danza. Nun discurso acorde coa traxectoria da compañía, o espectáculo tenta representar o baleiro que supón ser persoas soas e illadas nunha sociedade sen memoria e mostra a importancia de recuperar a esencia ancestral -a tradición, a terra, a familia, a casa- a través da experiencia colectiva. O prestixioso coreógrafo Sharon Fridman, asina a dirección artística deste espectáculo de gran formato co que a compañía celebra o seu 20 aniversario. Nova Galega de Danza é unha compañía de longa traxectoria, precursora na procura de novas formas de expresión que fusionen a tradición folclórica galega coa danza contemporánea. Finalista nos premios Max en diversas ocasións, a súa traxectoria foi recoñecida tamén co Premio da Cultura Galega das Artes Escénicas 2021. O 21 de abril haberá espazo para un espectáculo pensado para a cativada. El cuento de Persépolis, de La Coja Dansa, ten como argumento o achádego, por parte de tres nenas que viven en diferentes planetas, do libro Persépolis. Coa súa lectura produciranse numerosas preguntas sobre a situación das mulleres na historia que levan as protagonistas a levar a realizar unha viaxe pola historia, o espazo e o tempo, nun itinerario no que conflúen a danza o cómic, o videomapping e o cine. A compañía valenciana rende homenaxe, con esta obra, ás escritoras de ficción que coas súas obras literarias cuestionan o status das mulleres e as súas constantes perdas de dereitos. 'Ceibe': a danza liberadora de Fran Sieira Circo e artes plásticas O día 26, Miguel Barreto y la pequeña Victoria Cen porán en escena Disculpa si te presento como que no te conozco, un espectáculo que mestura a danza e o circo, xogando coa simetría, a duplicidade e a ambigüidade para compoñer imaxes sorprendentes, diálogos acrobáticos e escenas oníricas que reflexionan sobre a identidade e as relacións cos outros. "Ao conectar con diferentes emocións configúrase unha obra que ten un significado particular para cada persoa e para que cada persoa faga a súa propia versión e descubra a través da danza e do circo a dualidade quen é o outro-quen son eu", resumen desde a compañía. Finalmente, o 30 de abril a compañía navarra Led Silhouette fechará o Primavera en Danza deste ano coa obra Los perros, o relato dun home "que se contempla no outro para atoparse a si mesmo". O recoñecido creador Marcos Morau dirixe esta proposta que viaxa por unha sucesión de imaxes nun cruce de tempos e linguaxes. Esta compañía navarra é o proxecto persoal como creadores de Martxel Rodríguez e Jon López, bailaríns da célebre compañía La Veronal (cuxo espectáculo Siena puido verse hai uns anos na Mostra de Teatro de Ribadavia). Influenciados pola arte contemporánea, investigan sobre novas formas de movemento, colaborando con artistas visuais, documentadoras ou musicais para xerar atmosferas transformadoras. Janet Novás: facendo que o corpo conte Paula Quintas, a arte contemporánea e o público Dentro dun programa que atende as novas fórmulas da modernidade e á hibridación, destaca o espectáculo de Paula Quintas, que fai parte da súa tese de doutoramento en Arte Contemporánea na Facultade de Belas Artes da Universidade de Vigo. "En realidade, Multiperspectivas é a parte práctica da tese", explica Quintas a Nós Diario. "Trátase dun traballo de investigación que se centra nos límites entre o público e o privado e que vai pasando por distintas fases -cápsulas- nas que o espectáculo cambia de acordo coas necesidades do proxecto". O proxecto afonda nos límites entre o público e o privado, no papel das persoas espectadoras e de como estas poden pasar a ser parte activa do espectáculo até o punto de dirixilo. "Sen esta parte de enfrontamento co público", aclara a bailarina e coreógrafa, "a investigación non podería levarse a cabo". "En certa forma é ir á contra das fórmulas de mercado", advirte, "xa que este só contempla a conceptualización dun proxecto en forma de produto. Mais a experiencia agora, tamén fronte ao público, está sendo moi boa". Paula Quintas conta, para este proxecto, coa colaboración de Rut Balbís, Arturo Cobas e Antón Coucheiro, e coa iluminación de Laura Iturralde.