Comediártiko leva a crítica entre risos ás táboas de Vigo

Comezou o outono e comezaron tamén as tardes de teatro na viguesa Sala Ártika. O espazo situado na avenida de Beiramar está a acoller a cuarta edición do Festival Comediártiko. Do 7 de outubro ao 19 de novembro, sete compañías –Impulso Teatral, Chévere, Off Compañía, Sutottos, Teatro Arbolé, Sala Cero e A Panadaría– traen as súas creacións a Vigo unidas por un elo común: a comedia. "Para nós como sala é moi importante falar xa da cuarta edición deste festival porque significa que se está a consolidar como evento", explica a Nós Diario Rocío Salgado, responsábel de distribución de Ártika. Así, o IV Festival Comediártiko comezou coa peza Como ser superwoman e non morrer no intento, de Impulso Teatro, unha viaxe ao pasado onde as exixencias, valores, culpas e demais demos atorméntannos no presente. A obra, que inaugurou o Comediártiko o pasado 7, "honra a muller, desde onde todos partimos". Pero, sen dúbida, apenas Carmen Trueba e Susanna Caralt comezan o espectáculo, vemos que non existen guerras de sexos, nin tampouco imos aos extremos, se non que intentamos rescatar "á que está a punto de morrer no intento". Manuel Rivas, Ugia Pedreira, Chévere ou a Cova Eirós entre os galardóns da crítica da Galiza A lenda da liña de tren Pobra de Seabra-Ourense E esta fin de semana é a quenda de Chévere, mais hai xa varios días que o cartel de completo colga da billeteira da sala. "Sendo a compañía Chévere fainos moita ilusión que veñan á Ártika e que o fagan cun 'sold out' total como eles merecen", valora Salgado. Chévere trae a Vigo unha peza que ironiza sobre o xénero documental combinando teatro e cine en directo, unha adaptación á escena do formato deses documentais sobre crimes reais que tan de moda están nas plataformas de contidos audiovisuais como Netflix ou HBO Max. A de Chévere, Curva España, é unha alegoría sobre España que se serve dun relato local que se foi transmitindo oralmente de xeración en xeración entre a xente da comarca de Verín, para confrontar a realidade coa ficción, a historia coa lenda. Curva España trata sobre un crime aparentemente sen resolver, unha morte violenta que provoca sospeitas e interrogantes sobre as súas causas, motivacións e consecuencias. A historia narra –con Patricia de Lorenzo, Miguel de Lira, Lucía Estévez e Lucía T. Blanco sobre as táboas– unha investigación dun suceso do pasado e sobre as súas implicacións no presente. Un suceso real que tivo un impacto directo limitado a unha pequena comunidade da Galiza interior, pero no que se desvela o modo no que se vertebrou o estado liberal español durante os séculos XIX e XX, en paralelo á construción do tren. É unha historia que dá para falar da "España Baleirada", das consecuencias da coñecida como Lei Mordaza sobre a liberdade de expresión, da unidade nacional ou de como a xente constrúe narrativas alternativas á historia oficial. Unha obra, en definitiva, que encaixa perfectamente na liña de traballos desenvolvidos por Chévere nos últimos anos, nos que exploran as posibilidades do teatro-documento e a memoria colectiva como desencadeantes dunha ficción teatral. Trinta e cinco anos do teatro de Chévere nun só volume Risas sobre o escenario A Chévere seguiralles Off Compañía con Enfeitizados. O príncipe e a princesa que viaxaron ao noso tempo, que actuarán o 21 e o 22 de outubro cun espectáculo musical que narra a historia dun escritor de novela negra en plena crise creativa. Inestables, do dúo Sutottos, subirá ao escenario da Ártika o 28 e o 29 de outubro cunha obra que xira arredor do medo e os seus derivados: paranoias, fobias, obsesións e ansiedades. Tres cousas, de Sala Cero, representarán os días 11 e 12 de novembro unha peza sobre unha parella que se coñece durante unha noite de festa. A sala Ártika de Vigo busca asentarse como alternativa para toda a familia no ocio da cidade O 4 e 5 Arbolé traerá A biblioteca imaxinaria, buscando transmitir ás crianzas o pracer das lecturas. "Sempre intentamos incluír espectáculos para toda a familia. Para nós é importante incluír as crianzas na programación da sala. A comedia ten que ser para os adultos e as adultas, pero tamén para as nenas e os nenos. Crear un público estábel e chegar a ser a alternativa a outras mil actividades que hai sempre en Vigo é un dos nosos obxectivos", di Salgado. E fechará o festival o 18 de novembro a compañía A Panadaría coa representación da obra As que limpan, sobre a loita organizada das camareiras de piso coa que fixeron 'sold out' a última vez que visitaron a viguesa Sala Ártika. "Este é un regalo para a veciñanza de Vigo que ficou sen velas e é tamén unha honra recibir unha compañía que é xa parte da familia da sala", valora Rocío Salgado para Nós Diario. A grande estrea do Revenidas Miúdo O outono é temporada de teatro Cunha ampla variedade de xéneros, onde destaca a comedia, pero tamén propostas alternativas a Sala Ártika de Vigo acollerá esta temporada 41 representacións a cargo de 25 compañías galegas e outras foráneas. Así, polo escenario da Ártika pasaran entre setembro e decembro montaxes de teatro, monicreques, musicais e de danza, entre os que destaca o festival Pequeártiko co que buscan achegar o teatro ás crianzas, e para os cales xa están á venda as correspondentes entradas.