sábado 22.02.2020
Entre o 10 de outubro e o 12 de decembro

O científico Xurxo Mariño abre o ciclo 'Para estar no mapa do mundo' da Alexandre Bóveda

Conexións. Unha viaxe arredor do mundo con destino Galiza é o título da palestra que abre o ciclo Para estar no mapa do mundo, da asociación cultural Alexandre Bóveda. Impartiraa a quinta feira, dez de outubro, o neurocientífico e divulgador Xurxo Mariño, e tratará de como “viaxar polo mundo adiante” axuda a “comprender e coñecer o que se vai observando na medida en que se estabelezan conexións co mundo cotián”.
O neurocientífico e divulgador Xurxo Mariño. Foto: cedida.
O neurocientífico e divulgador Xurxo Mariño. Foto: cedida.

Para estar no mapa do mundo reúne voces diferentes que tiran do fío dunha historia para amosar pensamentos, vontades e accións diferentes e así comprender, coñecer, propoñer ou tan sequera amosar o mundo do que formamos parte”, explica a asociación, en cuxo local da Coruña, sempre ás oito do serán, decorrerán as conferencias.

Á de Mariño sucederaa o cineasta Oliver Laxe (segunda feira, 14 de outubro), que disertará sobre “cinema e esencia”. A escritora e profesora da Univesidade de Santiago Teresa Moure falará a quinta feira, 24 de outubro, arredor do “discurso do ódio: a questão é saber quem manda aqui” e os usos emancipadores e dominadores da linguaxe.

O 30 de outubro, cuarta feira, volverá haber sesión cun escritor, desta volta Suso de Toro. Que pensará en voz alta pero sobre xeopolítica: Seguimos a imaxinar en mapas de cores, titúlase a súa achega. De Feminismos e dereitos democráticos reflexionará a profesora e concelleira do BNG en Compostela Goretti Sanmartín a quinta feira 14 de novembro.

Outro profesor, Jorge García Sanmartín, abordará as “masculinidades disidentes” a quinta feira 21 de novembro. A politóloga Maria Castelo e a enxeñeira agrónoma Begonha de Bernardo Minho ofrecerán a cuarta feira 27 de novembro unha intervención sobre ecofeminismo.

Será o polémico profesor Ramón Grosfoguel -da Universidade de Berkeley (California, Estados Unidos) quen se encargará a quinta feira 12 de decembro de pechar as xornadas, cunha palestra de título Unha mirada descolonial de Galiza: o Estado imperial español, a esquerda españolista e o soberanismo das nacións sen Estado. Segundo Grosfoguel, no actual contexto xeopolítico “emerxe a necesidade cada vez máis apremiante de descolonizar tanto os fundamentos epistémicos do pensamento filosófico eurocéntrico como as políticas derivadas del no Estado español”.

comentarios