O Chanfaina Lab, XI Premio José Sellier da Academia Galega do Audiovisual

É un galardón que outorga a AGA para premiar o labor de iniciativas salientábeis dentro do sector audiovisual
chanfaina 3

A Academia Galega do Audiovisual anunciou esta cuarta feira a concesión do XI Premio Especial José Sellier ao Chanfaina Lab, un proxecto de creación audiovisual colectiva que se celebra no concello de San Sadurniño.

A Academia quere recoñecer unha iniciativa "que fomenta a liberdade creativa e favorece a convivencia, unindo cineastas de calquera idade, xénero, procedencia ou traxectoria para compartir experiencias arredor da obra cinematográfica. Unha proposta que reinvindica a súa alma rural e o seu espírito comunitario, sendo quen de implicar a veciñas e veciños e de inspirar as vocacións de novas xeracións de cineastas."


Chanfaina Lab convida creadores audiovisuais a gravar no concello de San Sadurniño unha curtametraxe durante unha fin de semana con total liberdade temática e estilística, con San Sadurniño como referente. No mes de febreiro os filmes son proxectados nun acto público coa asistencia dos autores e auotas e a veciñanza do Concello. A convivencia de cineastas locais de diferentes idades e procedencias con outros de traxectorias consolidadas enriquece unha proposta que se fundamenta no respecto polo territorio.

Álvaro Pérez Becerra, presidente da Academia Galega do Audiovisual, destacou este vínculo con San Sadurniño: "o Chanfaina Lab é imprescindíbel porque pon o foco no territorio, que debera ser un protagonista máis no audiovisual que producimos aquí. Aposta ademais por unha mirada ampla sobre o talento, contando con creadores de diferentes idades e experiencias" ao tempo que definía á iniciativa galardoada co XI Premio Sellier como "todo un exemplo de como debemos comportarnos como sector."



O premio Sellier é un galardón que outorga a Academia Galega do Audiovisual para premiar o labor de iniciativas salientábeis dentro do sector audiovisual; debe o seu nome ao pioneiro do cinema José Sellier Loup, quen, en maio de 1897 filmou, na Coruña, as primeiras películas rodadas no Estado con cámara Lumière.

A entrega de premios terá lugar o vindeiro sábado 3 de decembro ás 20 horas, no Teatro Colón da Coruña e contará coa presenza de Alfredo e Marta Sellier, descendentes do pioneiro da cinematografía, que serán os encargados de entregar ao Chanfaina Lab un trofeo deseñado polo artesán coruñés Teodoro Castro, que reproduce a cámara Lumiere coa que José Sellier gravou aquelas primeiras imaxes da vida cotiá na cidade da Coruña.

O Premio Especial José Sellier é unha iniciativa da Academia Galega do Audiovisual, que conta co apoio do Concello da Coruña.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios