[Alberte Mera]
Representantes públicos encheron onte igrexas e desfiles militares para enxalzar as forzas armadas e a españolidade, porque diso se trata o 12 de outubro, din, no chamado Día da Hispanidade, que bebe dese Día da Raza, que recorda aquela horrenda película Raza, dirixida por José Luis Sáenz de Heredia baixo as ordes de Francisco Franco e que ten no guión, evidentemente, o máis vergoñento nunca visto na pantalla (si, lectoras e lectores, Franco foi guionista deste filme). Séculos despois da colonización dos pobos de América pola Coroa de Castela e o masacre acometido, é incomprensíbel a celebración a día de hoxe de tales acontecementos, pois descubertos xa eles o estaban, semellante "embiguismo" só é propio de imperialistas fracasados e vidos a menos.
Onte desfilou por Madrid 'Pacoli', a cabra dos lexionarios. A Lei de benestar animal nin afecta ao Exército español. E en datas como esta de exaltación do militarismo español, lembro os amigos, galegos comprometidos nos 90 e hoxe, que pelexaron con toda a súa valentía contra o Servizo Militar Obrigatorio.
Insubmisos que foron encarcerados por se rebelaren ao Goberno e Exército españois, que non acreditaron en perder os seus mellores anos de vida para servir a rojigualda e fomentar a violencia das armas, que pelexaron para que os que viñemos detrás non tiveramos que facer esa horrenda Mili. Insubmisos, sempre obrigado!
