mércores 19/05/21

Traballadores do Metal piden a CC.OO. e UXT que reconsideren a sinatura do convenio, que "non se consultou aos obreiros"

Volven denunciar a "traizón" destas centrais cun acordo que, denuncian, incide na "precariedade"

EuropaPress_3682879_operarios_plataforma_trabajadores_metal_cortan_trafico_bouzas_vigo_protesta
Operarios da Plataforma de Traballadores do Metal cortan o tráfico en Bouzas, Vigo. (Foto: Europa Press)

A Plataforma de Traballadores do Metal, integrada por operarios de auxiliares (maioritariamente do naval), volveu denunciar esta segunda feira a "traizón" do preacordo do convenio provincial do sector, e pedíronlle a CC.OO. e UXT que reconsideren o acordo (CIG non o asinou) antes da sinatura, prevista para esta terza feira.

Nunha rolda de prensa celebrada en Vigo, un dos portavoz da plataforma, José Calvar, volveu insistir en que o preacordo entre eses dous sindicatos e a patronal alcanzouse "de costas" aos traballadores e que "só beneficia as empresas". Por iso, pediulles a CC.OO. e a UXT unha "reflexión" antes de asinar o convenio.

"O agravio deste convenio vainos a levar ás colas da fame", advertiu e denunciou que non se consultou sobre o preacordo "nin aos obreiros, nin sequera aos enlaces sindicais".

"Este acordo é fraudulento de principio a fin, non sabemos que intereses terán por detrás para asinar", afirmou, e insistiu en que os termos do texto inciden na "precariedade".

Entre as cuestións do preacordo que denuncian están as condicións "aínda máis precarias" na que, ao seu xuízo, quedan os traballadores eventuais, que son maioría nas empresas; así como as diferenzas nas condicións laborais con respecto aos operarios fixos de cadro.

Alfredo, outro dos portavoces da plataforma, criticou que o convenio do Metal non contemple cláusulas específicas para os traballadores do naval e que estes poidan, como noutras provincias ou territorios, beneficiarse de certos complementos (por toxicidade, perigo, etc.)

Os traballadores protagonizaron esta segunda feira unha protesta fronte ás instalacións de Construcións Paulino Freire, na zona de Bouzas (Vigo), onde cortaron o tráfico durante uns 15 minutos e corearon consignas contra os sindicatos como "Non nos representan!" ou "Convenio do metal, traizón sindical".

Ademais, na xornada deste sábado, un grupo de membros desta plataforma (que segundo aseguran conta con varios centos de operarios e apoios desde Euskal Herria ou Holanda) irrompeu nas manifestacións de CCOO e UXT, que percorreron as rúas do centro de Vigo con motivo do 1 de maio, ao berro de "traidores" ou "vendidos".

comentarios