venres 03/12/21

Traballadoras de residencias volven concentrarse para denunciar as súas condicións e reclamar un novo convenio

Lamentan que a posición patronal está "supeditada" aos intereses de grandes grupos, como DomusVi
trega traballadoras resicencias EP
Concentración diante da delegación da Xunta en Vigo

Traballadoras de residencias de maiores volveron concentrarse, esta vez en Vigo, para seguir denunciando as súas condicións laborais, a falta de persoal nos centros xeriátricos, e para reclamar novamente a negociación e sinatura dun novo convenio colectivo galego, tendo en conta que o anterior caducou a finais de 2019.

A secretaria da asociación Trega (Traballadoras de Residencias de Galiza), Maribel Barreiro, lamentou que este sector leve dous anos sen actualizar o seu marco de relacións laborais, en condicións salariais precarias, e con sobrecarga de traballo por escaseza de persoal.

Nese sentido, advertiu de que algunhas das empregadas nin sequera chegan ao salario mínimo, e lamentou que esas malas condicións non só xeran "secuelas físicas e psicolóxicas" no persoal, senón que se traducen nunha peor asistencia aos usuarios dos centros.

"Hai enfermeiras que por cada hora nocturna de traballo apenas cobran 2 euros"

Maribel Barreiro proclamou que non só deben mellorarse as condicións salariais, senón dotar de máis recursos humanos e técnicos aos centros, e advertiu que a Xunta "debe pórse as pilas" porque, á fin e ao cabo, é a administración que fixa os cocientes de persoal e as condicións de prestación do servizo. Así mesmo, reclamou á Inspección de Traballo que actúe "como ten que ser", e impoña sancións onde sexan necesarias.

Por outra banda, advertiu de que se incorpora a persoal sen a formación adecuada, e concluíu que "non se pode dar un bo servizo" cando hai enfermeiras que por cada hora nocturna de traballo apenas cobran 2 euros. "Os nosos maiores son cidadáns de primeira e non de terceira, e teñen dereitos", subliñou.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Patronal

Mentres, a presidenta de Trega, Sonia Jalda, criticou a posición da patronal, que non acepta negociar o convenio e que está mediatizada polos intereses dos grandes grupos, como DomusVi.

"Despois da pandemia a situación empeorou, hai despedimentos e non se renovan contratos, e nin sequera podemos facer folga porque non se poderían cubrir os servizos mínimos", denunciou, á vez que lembrou que, nos últimos dous anos, só se celebraron tres reunións para renovar un convenio que xa foi denunciado en novembro de 2019.

Traballadoras de residencias volven concentrarse para denunciar as súas condicións e...
comentarios