As asembleas de traballadoras desta quinta feira ratificaron por práctica unanimidade o preacordo alcanzado entre a CIG e a patronal para o convenio colectivo da limpeza de Lugo. Este aval por parte do sector supón tamén a desconvocatoria da folga indefinida iniciada o pasado 16 de outubro.
A representante da CIG, Asunción Castiñeira, destaca o sentir das traballadoras e dos traballadores que participaron nas asembleas, que trasladaron a súa satisfacción polos termos do preacordo tanto no relativo aos incrementos logrados (18,3% durante a vixencia do convenio), como polas cláusulas que se estabelecen e as melloras laborais recollidas.
Máis tamén por conseguir frear os recortes que a patronal estatal Aspel pretendía introducir no cobro dos trienios modificando o sistema de cálculo da antigüidade. Este recorte estivo desde o primeiro día enriba da mesa e era unha das propostas ás que a patronal non estaba disposta a renunciar. "Foi grazas á capacidade de loita, á determinación e á resistencia das traballadoras como se conseguiu a súa retirada", salienta Castiñeira.
En materia económica, subliña que nunca se acadaran unhas subas salariais tan elevadas no convenio provincial da limpeza e, incluso a nivel estatal, os incrementos pactados son os máis altos dos convenios asinados neste sector en datas recentes.
Castiñeira engade que as subas acordadas tamén se aplicarán ao plus de traballo en domingos e feriados; que se introduciu unha cláusula de garantía de que todas as traballadoras e traballadores cobrarán, como mínimo, o SMI vixente en cada momento; e unha cláusula para aplicar de maneira automática unha suba de 2% se no primeiro trimestre de 2027 non se constituíu a comisión negociadora.
"Exemplo de loita"
A CIG quere pór en valor a exemplar loita levada adiante polas traballadoras da limpeza, que foron capaces de "soster unha folga durante 130 días para enfrontar unha patronal moi belixerante e intransixente" que buscaba neste convenio consolidar a pobreza e a precariedade laboral.
"As traballadoras entenderon e acreditaron na mobilización como o único camiño para avanzar nos seus dereitos. A súa loita é un exemplo para toda a clase obreira e un exemplo de loita feminista contra a precariedade e a explotación nun sector esencial e feminizado pero tan pouco valorado como a limpeza", asevera Asunción Castiñeira.
