TRABALLO

Sobe o paro rexistrado en novembro

Sobe o paro rexistrado en novembro

Galiza é o segundo territorio onde se rexistra un incremento maior con 3.066 persoas máis, mentres no conxunto do Estado español baixa (-27.071).

O Ministerio de Traballo publicou esta cuarta feira (2 de novembro) os dados do paro rexistrado correspondentes ao mes de novembro.

Segundo o goberno español Galiza sitúase como o segundo territorio onde máis se incrementou o número de persoas desembregadas (3.066), só por baixo das Illes Balears, fronte a unha redución no conxunto do Estado español de 27.077 persoas.

En termos relativos trátase dun incremento do 1,38% a respeito do mes de outubro e descende en relación ao ano anterior no mesmo período, cando se rexistrou o 9,44% máis.

Por provincias, o paro só descende en Ourense (-849) e Pontevedra (-241) ficando en 25.082 persoas e 89.496, respectivamente. Lugo (22.391) e A Coruña (88.189) aumentan.

Menos da metade das persoas desempregadas (225.158) perciben algún tipo de prestación

Por sexos, as mulleres continúan a encabezar as cifras de desemprego, atinxindo 122.449 fronte á 102.709 homes.

Os sectores que rexistran maiores cifras de paro son os servizos (144.366) e a industria (27.534), seguidos da construción (26.046) e a agricultura (8.770).

Os contratos que se crearon no último mes ascenden a 68.070, o 12,72% menos que en outubro e o 16,75% máis na variación interanual. Porén, a temporalidade mantense en taxas moi elevadas, sendo que de todos eles 62.791 eran de carácter temporal. Fronte a apenas 5.279 contratos indefinidos.

Na Galiza, actualmente menos da metade das persoas desempregadas (225.158) contan con algunha prestación por desemprego (108.361).

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios