Persoal de Ilunion Servizos Industriais Galiza, centro especial de emprego do grupo Once, mobilizouse novamente na mañá desta sexta feira en Vigo para exixir un convenio de empresa "xusto" e salarios "dignos".
Fixérono fronte á sede de Stellantis, xa que, explica a CIG nun comunicado, os 620 traballadores e traballadoras de Ilunion prestan servizo en compañías do sector do automóbil como a factoría viguesa ou Lear, Benteler e Denso, entre outras.
O sindicato advirte que o persoal desta compañía percibe o salario mínimo interprofesional e sofre "altos ritmos de traballo".
"Ademais de non recibir a formación obrigatoria estabelecida por lei, algo especialmente grave tendo en conta que se trata de persoas con capacidades especiais, tanto físicas como psíquicas", salientan.
A elas e eles aplícaselles o convenio estatal de Centros Especiais de Emprego, mais a CIG demanda que se lles aplique o do sector no que prestan servizo ou, en caso contrario, que se negocie un propio.
A central sindical solicitou un AGA —procedemento extraxudicial de resolución de conflitos de traballo—, mais Ilunion "rexeitou a mediación".
"No marco desta iniciativa desenvolvéronse xa numerosas mobilizacións, tanto diante da sede do grupo Once como das distintas empresas da automoción nas que o persoal de Ilunion presta servizo", precisa a CIG.