O paro volve subir na Galiza, que rexistra máis de 130.000 persoas no desemprego

Galiza rexistrou un total de 130.643 persoas no desemprego no pasado mes de setembro. Segundo os datos ofrecidos polo Goberno do Estado no día de onte, o número de persoas desempregadas medrou en 2.918 en relación con agosto, o que significou un incremento de 2,28%. Neste sentido, trátase do segundo mes consecutivo onde medra a poboación non ocupada, destacando o negativo comportamento do sector servizos. Galiza sitúase á cabeza do Estado español en incremento do desemprego. Só presentan peores resultados Estremadura (+3,44%) e Andalucía (2,29%). A nivel estatal o paro rexistrado medrou 0,73%, con 19.768 persoas máis, até alcanzar as 2.722.468 persoas. Con respecto a agosto, en setembro baixou o desemprego na Rioxa (-4,88%), Euskadi (-1,78%), Canarias (-1,64%), Aragón (-1,45%), Ceuta (-1,21%), Catalunya (-1,02%) e País Valencià (-0,49%). O peor comportamento certificouno o sector servizos. Un mes máis, volve liderar a destrución de emprego, achegando 1.993 novas persoas no desemprego, até o punto de representar case o 70%. As persoas sen un traballo anterior son as seguintes que máis pasan a engrosar as listaxes do paro, 430, seguidas das e dos profesionais que procedían da industria, 303; as do sector primario, 108, e as da construción, 84. Un total de 92.661 persoas no paro pertencen ao sector servizos, seguidas da industria, con 13.176; as que non tiñan un emprego anterior, 11.852; as da construción, 8.828, e as do sector primario, 4.126. A este respecto, os datos de ocupación de setembro volven mostrar que aqueles sectores onde é maior a temporalidade e a parcialidade rexistran un peor comportamento laboral. Por outra parte, 60% das persoas desempregadas son menores de 45 anos. Neste sentido, o maior incremento do paro prodúcese na totalidade das franxas de idade, porén o elevado número de persoas mozas nesta situación evidencia as limitacións da nova normativa laboral para crear emprego. A maiores, no que vai de ano incrementouse en 16.000 a cifra de contratos eventuais. Afiliacións á Seguridade Social Galiza perdeu 6.799 afiliadas e afiliados á Seguridade Social no mes de setembro. Segundo as cifras achegadas onte polo Ministerio de Inclusión, Seguridade Social e Migracións, o número medio de afiliacións atópase en 1.071.112 persoas, o que representa unha baixada de 0,63% en relación a agosto. Neste caso, os números máis negativos preséntannos as demarcacións de Lugo e Pontevedra, cunha caída de 1,19% e 0,73% respectivamente. Así, Galiza rexistra unha das peores cifras do Estado español. A caída das afiliacións á Seguridade Social na Galiza atópase por riba da media estatal, que marcou un incremento de 0,09%, porén por detrás do país aparecen Illes Balears, con -2,60%; Asturias, con -1,59%, e Estremadura, con -1,38%. As afiliacións á Seguridade Social minguaron en 0,7% no réxime xeral no mes de setembro e continúan a representar 78,9% do total. Neste caso, o descenso vén motivado polo remate da tempada estival e pola fin dos contratos asociados ao período turístico. Concretamente, o sector servizos, cunha importante taxa de temporalidade e parcialidade, é o máis afectado. A crise de determinadas ramas de actividade do sector servizos percíbese na cifra de persoas afiliadas á Seguridade Social do réxime especial de traballadores autónomos (RETA). Neste sentido, a caída alcanza 0,68% no mes de setembro, coa demarcación de Lugo (-1,62% ) e Ourense (-1,56%) rexistrando os peores datos. Ao tempo, no último ano, Galiza perdeu 0,24% de traballadoras e traballadores por conta propia, mentres no conxunto do Estado este tipo de contratación medrou en 0,17%. O secretario de Negociación Colectiva da CIG, Francisco Sío, valorou onte negativamente os datos e advertiu de que “somos a terceira comunidade na que máis medrou o desemprego porque son o sector servizos e nomeadamente a hostalaría, quen tira da nosa economía”. Nesta dirección, Francisco Sío puxo de manifesto que “seguimos tendo un mercado laboral moi precario baseado en sectores que son temporais, que teñen que ver cun período estival no que hai alta afluencia de turistas e, por tanto, demanda de emprego, pero que non xeran traballo estábel”. O secretario de Organización de UXT, José Luis Fernández Celis, denunciou un peor comportamento do emprego na Galiza que no Estado e afirmou que “os datos correspondentes a setembro mostran unha evolución do desemprego marcada pola estacionalidade propia da fin do período estival". "Desta forma, o paro rexistrado crece en 2.918 persoas debido á finalización da tempada alta da campaña de verán, e o número de persoas afiliadas á Seguridade Social baixa na Galiza en 6.799, mentres que no resto do Estado aumenta en 18.296”, advirte o sindicalista da UXT. Ao tempo, a secretaria de Emprego de CCOO, Maica Bouza, asegurou onte que “estamos diante duns datos que se reproducen cada mes de setembro, cando remata a temporada de verán”, porén, salientou que “a diferenza está en que o incremento do desemprego en Galiza é superior ao do mesmo mes de anos anteriores”. Nesta dirección, entende que “Galiza necesita algo máis que turismo e Xacobeo para medrar e crear emprego de calidade”. Os sindicatos poñen o foco na precariedade e na temporalidade As organizacións sindicais valoraron de maneira diferente os datos sobre emprego. Así, Francisco Sío (CIG) considera que evidencian que "a reforma laboral foi un desastre, creo que o Goberno ten que recoñecer o grave erro que cometeu aceptando esta reforma patronal que non arranxou absolutamente nada". Nesta perspectiva, entende que "non podemos chamar emprego estábel a un emprego onde as persoas non saben canto tempo van poder traballar e unha parte importante do tempo van estar cobrando o desemprego, se o teñen, ou intentando buscar un posto de traballo pese a ter a condición de indefinidos". José Luis Fernández Celis (UXT) explica que “é hora de pasar a resolver outras deficiencias estruturais que aínda continúan enquistadas, impedindo un funcionamento eficiente do mercado de traballo que se traduza nunha mellor calidade de vida das persoas traballadoras. Unha delas é a precariedade que aínda continúan sufrindo miles de persoas nos seus postos de traballo. A outra é o desemprego de longa duración, que continúa manténdose en niveis moi elevados, e cuxas causas se atopan nas deficiencias das políticas activas de emprego”. Maica Bouza (CCOO) analiza que “o aumento do desemprego explícase pola caída da contratación nos servizos ligados fundamentalmente á estacionalidade” e insta o presidente da Xunta da Galiza, Alfonso Rueda, a asumir a súa obriga "de gobernar ao servizo de Galiza e non do PP estatal". Neste sentido, reclama uns orzamentos galegos que “respondan ás necesidades do país”, apostando polos "servizos públicos para garantir sanidade, ensino e servizos sociais de calidade”.