Unha manifestación sairá ás 20:30 horas desta terza feira, 30 de maio, da Praza da Palloza da Coruña para demandar a recuperación de dereitos e un convenio digno para o sector do metal da provincia coruñesa. É un paso máis no calendario de mobilizacións e protestos que os traballadores levan semanas realizando. A primeira delas, a concentración de delegados perante a Confederación de Empresarios. "Ou ben hai un cambio de actitude e comezan a materializarse acordos ou do contrario a vontade do sector é continuar coas mobilizacións, sen descartar incluso a posibilidade dunha folga no metal", indicaban naquel entón.
Os sindicatos lembran que van dous anos desde o inicio da negociación do convenio e que a patronal mantén unha actitude de bloqueo. “Non acepta practicamente ningunha das reivindicacións presentadas pola parte social, pretendendo liquidar a negociación sen ningunha mellora substancial para os traballadores do sector", como apontan desde CIG-Industria.
A negociación está estancada, recoñecen as centrais, que acusan a patronal de teimar na idea “de eliminar dereitos xa conquistados, como a revisión salarial, e busca afondar aínda máis na distribución irregular da xornada”.