O número de persoas paradas rexistradas nas oficinas dos servizos públicos de emprego baixou en 956 persoas durante o mes de febreiro na Galiza, o que supón 0,66% menos que no mes anterior, segundo os datos publicados esta quinta feira polo Ministerio de Traballo e Economía Social. Esta cifra dista da contabilizada a nivel estatal, que reflicte un aumento do paro de 2.618 persoas no segundo mes do ano (+0,09%).
En concreto, febreiro fechou no país con 144.092 desempregados e desempregadas, isto é, 10.417 menos que no mesmo mes de 2022, caendo 6,74% de forma anual. Este descenso é similar ao que se produce no conxunto do Estado español, onde o paro diminuíu 6,45% nos últimos 12 meses, até os 2,91 millóns de desempregados, 200.669 menos que en febreiro do exercicio previo.
Todas as circunscricións galegas rexistraron caídas no número de parados, con Pontevedra á cabeza, onde o desemprego caeu en 354 persoas, 0,63% menos que en xaneiro. Na Coruña, este dato foi de 335 persoas (-0,57%), mentres que en Lugo baixou en 210 persoas (-1,52%) e en Ourense, en 57 persoas (-0,34%).
Máis da metade das persoas paradas (58,3%) son mulleres, e 4,07% ten menos de 25 anos. Por sectores, 4.739 desempregados e desempregadas pertencían á agricultura (-70), mentres que 14.780 eran da industria (-271) e 10.064, da construción (-83). O sector servizos aglutinou 102.581 parados en febreiro (-842), e 11.926 dos parados galegos non tiña un emprego previamente (+310).
5.086 afiliacións á Seguridade Social
Pola súa parte, a Seguridade Social gañou unha media de 5.086 afiliados e afiliadas en febreiro na Galiza, o que supón 0,49% máis que no mes anterior, mentres que no último ano o dato de cotizantes incrementouse en 9.678 persoas, 0,94% máis. Todas as provincias galegas aumentaron a súa cifra de afiliados, coa Coruña á cabeza, que sumou 2.635 novos cotizantes en febreiro (+0,59%). En Lugo, este dato subiu en 444 persoas (+0,37%); en Ourense, 498 novos cotizantes (+0,48%), e en Pontevedra, 1.510 (+0,42%).
Deste modo, no país contabilizáronse en febreiro unha media de 1,035 millóns de cotizantes á Seguridade Social, mentres que a nivel estatal este dato ascendeu a 20,17 millóns, 0,44% máis que en xaneiro (+88.918 novos afiliados). Do total de cotizantes galegos e galegas, 811.535 corresponden ao réxime xeral, mentres que 205.060 eran persoas autónomas e 19.229, traballadoras do mar. Entre outros datos, en febreiro uns 950 galegos estaban nun expediente de regulación temporal de emprego (ERTE).
Datos estatais
No conxunto do Estado, o número de parados rexistrados nas oficinas dos servizos públicos de emprego subiu en 2.618 persoas en febreiro en relación ao mes anterior (+0,09%), tras o fin da campaña de rebaixas e impulsado polo crecemento do desemprego entre a mocidade, mulleres e persoas estranxeiras.
O departamento que dirixe Yolanda Díaz destacou que a "leve" repunta do desemprego rexistrado en febreiro, de "apenas" 0,1% en termos porcentuais, reflicte "a tendencia de estabilidade no mercado laboral". A suba de febreiro deste ano, a segunda consecutiva tras a de xaneiro, contrasta co descenso en 11.394 persoas experimentado en febreiro de 2022, pero está por baixo da media de febreiro dos últimos 15 anos, que lanza un incremento de 35.280 desempregados.
Desde o inicio da serie histórica comparábel, en 1996, o paro subiu en febreiro en 13 ocasións e reduciuse en 15. Tras este lixeiro crecemento de febreiro, o número total de parados situouse en 2.911.015 desempregados, a menor cifra nun mes de febreiro desde 2008.
En termos desestacionalizados, o paro rexistrado diminuíu no segundo mes de 2023 en 6.345 persoas. No último ano o desemprego acumula un descenso de 200.669 parados, o que supón 6,4% menos, cun retroceso do paro feminino de 96.427 mulleres (-5,4%) e unha caída do desemprego masculino de 104.242 homes (-8,2%).
Tamén a nivel estatal, a Seguridade Social gañou unha media de 88.918 cotizantes en febreiro respecto ao mes anterior (+0,44%), a maior alza neste mes desde 2015, cando a afiliación se incrementou en case 97.000 persoas.
