77% dos empregos a tempo parcial son desempeñados por mulleres

"A discriminación salarial persiste”, porque aínda que a fenda aminorou levemente, de 19% a 18,6%", 42,4% das traballadoras galegas obtiveron no último ano uns ingresos inferiores ao salario mínimo interpofesional (41,5% en 2019), mentres que no caso dos homes foron 29,1% do total. Así o sinalou esta sexta feira a secretaria de Mulleres da Confederación Intersindical Galega (CIG), Nicolasa Castro Monteiro, na presentación do Informe sobre a Situación laboral das mulleres en Galiza no ano 2022, acompañada pola responsábel do Gabinete Técnico de Economía da central sindical, Natividade López Gromaz. Fenda de xénero nas disciplinas científico-tecnolóxicas O estudo reflicte que o traballo das mulleres “está minusvalorado” e que, en consecuencia, “son os sectores máis feminizados os que teñen máis baixos salarios”. De feito, afirmou López Gromaz, a rama de actividade coa maior fenda de xénero é “outros servizos persoais e de ocio”, cunha presenza de mulleres de 58,7% e unha fenda de 29%. Os ingresos medios nesta rama de actividade “apenas superan a metade do Salario Mínimo Interprofesional (SMI)”, dixo a economista. "Nin sequera o factor formación beneficia as mulleres na mesma medida que aos nosos compañeiros, pois mesmo as mulleres máis novas, con maior formación que os seus compañeiros, cobran de media 11% menos que estes”, engadiu. “A fenda agrándase por mor da peor retribución dos sectores feminizados, mais tamén pola discriminación na modalidade de contratación", explicou a economista da CIG. Neste sentido, subliñou que "os contratos de xornada parcial aumentaron máis que os de xornada completa". A fenda na contratación parcial medrou en 2022 con respecto aos anos previos Desta maneira, no ano 2022 “77% das persoas traballadoras con contrato a xornada parcial son mulleres”, dixo, "máis que nos anos anteriores, xa que en 2021 esta porcentaxe era de 76,6% e en 2019 de 75,2%". Ademais, incidiu en que a taxa de temporalidade feminina é 5,5 puntos porcentuais superior á masculina en 2022. Unha temporalidade que afecta especialmente ás traballadoras do Servizo Galego de Saúde (Sergas), o que levou s secretaria das Mulleres a concluír que “a Xunta é a maior empresa de traballo temporal do país”. Tanto a secretaria das Mulleres como a economista da CIG coincidiron en atribuír aos efectos da reforma laboral o incremento da xornada parcial mais tamén, e sobre todo, "o aumento desorbitado da contratación fixa-descontinua". Unha modalidade contractual que, afirman, "aumentou en 787% en total, mais entre as mulleres en 889%". Sobre esta cuestión especificou que "antes, esta contratación estaba limitada a situacións moi concretas, mais agora estase a ampliar a todos os sectores co agravante de que tamén a están a aplicar as empresas de traballo temporal (ETT) enmascarando a contratación máis desregularizada, de forma que as traballadoras nunca saben cando van ser chamadas nin por canto tempo, o que fai imposíbel calquera planificación ou organización da conciliación e da vida en xeral”. A secretaria das Mulleres lembrou que, tal e como se apunta no informe, segundo o que os coidados son a segunda causa de xornadas a tempo parcial no caso das mulleres ou de abandono do mercado laboral, no momento da xubilación as mulleres “temos menores carreiras de cotización [aos 65 anos, a diferenza chega a 10 anos e 1 mes] e menores bases de cotización”. Castro Monteiro sinalou que “as diferenzas medias nas bases de cotización foron de 278 euros no ano 2020 e as maiores diferenzas sitúanse entre os 35 e 44 anos [395 euros mensuais]”. Por iso, segundo se recolle no informe, a día de hoxe a diferenza entre a pensión dunha galega e a dun galego é de 391,23 euros mensuais, superando xa a fenda de xénero nas pensións de 34%. A CIG denuncia que a nova reforma das pensións agravará a fenda Isto leva á CIG a concluír que “se xa tiñamos claro que a fenda nas pensións vai seguir medrando ao non se corrixiren as desigualdades no mundo do traballo, coa nova reforma das pensións agrandarase aínda máis ao aumentar de 25 a 30 anos o tempo de cálculo”. Finalmente, lembrou que as últimas mobilizacións máis importantes foron protagonizadas por sectores feminizados e agradeceu ás traballadoras de Inditex, da conserva, do Servizo de Atención no Fogar (SAF) e do Sergas o seguimento nas folgas. Mobilizacións durante a xornada do 8 de Marzo A Secretaría das Mulleres da CIG ten convocada para o día 8 de Marzo mobilizacións de delegadas en 12 cidades e vilas galegas. Unha xornada na que a central sindical denunciará "a precariedade laboral que sofren as mulleres nun contexto de crise económica e alza de prezos que é xa insostíbel". Ademais, a CIG aproveitou para dar a coñecer o seu lema reivindicativo para este 8-M: “A crise non a imos pagar as traballadoras”. As pensionistas galegas cobran 470 euros menos ao mes que os homes Neste sentido, a secretaria das Mulleres da central sindical nacionalista denunciou durante a rolda de prensa que "co pretexto da crise se está empobrecendo ás traballadoras a través dunha suba inxustificábel dos prezos de produtos e servizos básicos [como é o caso da alimentación, da enerxía, ou das hipotecas] que é inasumíbel con salarios que non permiten manter unha vida digna”. A fenda de xénero nos coidados alcanza 88% Con motivo do Día Internacional para a Igualdade Salarial, a Secretaría de Mulleres e Políticas de Igualdade e LGTBI+ de CCOO na Galiza, en colaboración co Gabinete de Igualdade do sindicato, ante a situación actual da fenda salarial no país, reivindicou esta semana "os dereitos económicos e laborais das mulleres", así como "a erradicación das desigualdades entre traballadores e traballadoras no mundo do traballo e na sociedade en xeral". As fendas de xénero O sindicato cuantificou a fenda en desemprego nunha taxa de 2%, en actividade en 8%, na parcialidade en 16%, nos salarios en 22%, nas pensións en 35%, e nos coidados en 88%. Salarios por hora Pola súa parte, UXT denunciou que a análise do Instituto Nacional de Estatística (INE) da retribución por hora en 2020 sinala que "as mulleres galegas, cunha retribución media de 13,78 euros por hora, ocupan o quinto posto pola cola entre as autonomías, só percibindo salarios por hora máis baixos as de Estremadura (13,33), Canarias (13,46), Andalucía (13,65) e Murcia (13,72). En relación ao salario por hora percibido polos homes, sinala UXT, a brecha na Galiza é de 9,28 puntos porcentuais, cunha retribución media de 13,78 euros fronte a 15,19.