O persoal do estaleiro galego Metalships decidiu desconvocar a folga indefinida, iniciada a finais do pasado agosto, tras chegar a un acordo coa empresa, que evitará despedimentos até 2025, segundo fontes do comité consultadas.
En concreto, o preacordo alcanzado divídese en dúas partes. Unha delas afecta a todo o persoal, xa que estabelece que durante a vixencia do convenio, até o 31 de decembro de 2024, a firma non pode despedir a ningún traballador.
A partir de aí e até a finalización da concesión da lámina de auga, a principios de 2026, a empresa terá que ofrecer algunha vía de flexibilidade, baixa incentivada ou recolocación, antes de despedir un empregado.
O preacordo, alcanzado na noite desta terza feira para a cuarta, foi aprobado esta mañá en asemblea de traballadores nunha votación "axustada", segundo recoñecen as mesmas fontes.
Acordos individuais
Pola súa banda, a negociación tamén inclúe outros acordos individuais cos sete traballadores despedidos. Só un deles será readmitido, mentres que catro aceptaron a proposta da empresa e outros dous mostraron a súa intención de xudicializar o caso, aínda que a compañía mostrou o seu interese para seguir negociando.
Precisamente Metalships, nun comunicado, informou de que renovará esta mesma cuarta feira a súa actividade co labor das empresas auxiliares, mentres que o persoal do estaleiro regresará na quinta aos seus postos.
"A compañía está inmersa na contratación de construción de novos barcos, así como na continuación da reparación naval. O estaleiro confía en volver ocupar, a curto e medio prazo, unha posición de liderado en innovación e construción especializada, operando no mercado global", sentenciou a empresa.