A confraría de Noia anuncia o fechamento da campaña de marisqueo máis curta da historia

Xa hai data de fechamento da campaña máis curta da historia (desde que hai rexistros) do marisqueo na confraría de Noia. A próxima quinta feira, 26 de outubro, as máis de 1.500 persoas que recollen bivalvo nas zonas de extracción do pósito noiés verán paralizada a súa actividade, tan só dez días despois do seu comezo, o pasado 16 de outubro. Desta maneira, os mariscadores e as mariscadoras da confraría de Noia pararán a extracción despois de tan só oito días hábiles de explotación (sempre e cando se poida saír nas xornadas restantes), sete no caso do marisqueo a pé, que non poderá traballar na segunda feira ao non coincidir o horario da marea. A decisión foi tomada por unha ampla maioría na Xunta Xeral, mentres que os votos discordantes foron emitidos por cabidos (representantes do sector) que apostaban por unha paralización inmediata. "Á xente non lle podes dar a nova de súpeto, é necesario que se preparen un pouco para que teñan tempo a recibila e a realizar os seus trámites", sinala o secretario da confraría de Noia, Adelo Freire. Indignación no marisqueo a pé noiés ante unha nova semana sen recoller bivalvo "É algo esperado mais é un golpe, a campaña durará oito días de traballo, sempre e cando non abran as comportas [da central hidroeléctrica do Tambre], xa que a cuarta feira dan moi mal tempo", engade. "Desde que hai datos non hai un ano que se lle aproxime [en brevidade de duración da campaña]", explica. "A escaseza de produto de tamaño legal [para ser comercializado] foi a principal razón para decidir o fechamento, os topes de inicio [cantidade de quilogramos que se poden coller] foron poucos e o produto moi pequeno, son unhas condicións difíciles, traballar por un quilo ou por dous non é rendíbel", sinala o secretario da confraría de Noia. "Estanse sacando 18 quilos de berberecho de primeira, cando se teñen sacado 1.800, e o produto non está ben, a vianda non medrou con normalidade. Estamos sacando unhas seis toneladas ao día de todas as especies e tamaños, cando en condicións normais teríamos que estar sacando 30 ou 40", asevera. "Saír para gañar 20 euros é facerlle máis dano á praia que outra cousa, para coller ese produto estás removendo moitos metros cadrados que están cheos de semente", argumenta Freire. Dato histórico de semente Os datos de semente son "históricos", por esta razón, desde a confraría de Noia entenden que a mellor opción é deixar de traballar para non danar o recrutamento, confiando en que o bivalvo estea listo o ano que vén e isto resulte nunha boa campaña. A Xunta escúdase no recrutamento de cría para evitar analizar a mortaldade do bivalvo nas rías "É algo que permite o optimismo de cara ao futuro, mais non é algo que nos dea de vivir hoxe", afirma Freire. Segundo os datos reportados pola bióloga da confraría de Noia, Liliana Solís, hai zonas nas con até 25.000 crías de berberecho por metro cadrado, o que multiplica por seis as estatísticas dos últimos 20 anos. "Só con que unha cuarta parte do recrutamento fora adiante sería unha barbaridade", explica. Porén, no ámbito da confraría noiesa existe un importante medo a que a baixa salinidade afecte a gran cantidade de cría que agora mesmo existe, e sinalan en concreto á necesidade de regular o desaugue dos encoros para que non se produza unha nova mortaldade do marisco. Protocolo de desaugue Sobre a razón de que non haxa bivalvo de tamaño para comercializar, Freire destaca "a mortaldade tan brutal que houbo en febreiro debido á baixa salinidade". Neste sentido, di, "exiximos que haxa un protocolo [para o desaugue dos encoros] que teña en conta o que hai río abaixo, estamos nunha zona en teoría protexida por rede natura, e tense que ter en conta un recurso que xa estaba aí antes de que as eléctricas chegasen". "O protocolo de desaugue dos encoros responde aos intereses das eléctricas", di Adelo Freire "Estamos elaborando un documento que imos presentar no próximos días para que se tomen medidas e se elabore un protocolo en condicións, o que hai só sinala a cota máxima e a cota mínima [de auga no encoro], mais non regula como actuar cando hai enchentes, non di nin cando nin como hai que soltar a auga, non o valoran. Existe un protocolo, mais responde aos intereses das eléctricas", denuncia. Carencia de fitoplancto Ademais, existe unha segunda razón que tamén afectou o tamaño de bivalvo nesta campaña, que foi a escasa cantidade de fitoplancto presente nas augas da ría de Muros e Noia. "No último semestre non houbo fitoplancto na ría, o que afectou todo o bivalvo, non só o berberecho e a ameixa que traballamos nós, senón tamén o mexillón que se produce noutras zonas da ría", explica o secretario da confraría. O sector do mar exixe atallar a alta mortaldade de bivalvos en Arousa "Houbo temperaturas da auga moi elevadas e ausencia de ventos de nordés, polo que non houbo o afloramento [do fitoplancto que alimenta o bivalvo] que tiña que haber", afirma. "Xuntáronse as dúas cousas, primeiro a mortaldade, e despois que o desove de bivalvo, a pesar ser grande, non chegou a medrar", engade. "Preocúpannos moito as altas temperaturas que se están a experimentar na auga, as nosas áreas de extracción teñen unhas características moi especiais que están expostas a un equilibrio moi sensíbel", conclúe Freire. As condicións para cobrar polo cesamento xeran incerteza Outra das cuestións que preocupan na confraría de Noia son as condicións para cobrar as prestacións derivadas do cesamento da actividade marisqueira. "Unha vez se decrete o fechamento [da extracción] por causas de forza maior poderase pedir o cesamento de actividade no Instituto Social da Mariña durante un mes, mais non estamos de acordo cos requisitos, pois son elaborados para as grandes frotas, non teñen en conta o marisqueo nin a pesca artesanal", sinala o secretario da confraría de Noia, Adelo Freire. Os requisitos fan que moita xente fique sen cobrar as prestacións "Non entendemos que se pidan 12 meses de cotización nos últimos 24, hai xente que non pode permitirse estar de alta todo o ano cando só traballa cinco ou seis meses, sobre todo a xente moza non pode pagar a seguridade social sen ter un ingreso", explica. "Non son axudas, son prestacións" "No caso de moitas prestacións en terra piden 12 meses en seis anos, non entendemos por que no marisqueo non", denuncia o secretario da confraría de Noia. "Hai que deixalo claro, non son axudas, son prestacións, van con cargo á túa cotización, ou tes cotizado ou non cobras, é como se fose o paro, e a xente que entrou na profesión hai menos dun ano, que os hai, non teñen dereito", conclúe Freire.