Unha delegación dos traballadores da planta de Chavín (Viveiro) da multinacional Vestas, que ameaza co fechamento da fábrica e un ERE que afecta 115 operarios, reuniuse esta segunda feira en Bruxelas cos eurodeputados Millán Mon (PP) e Nicolás González (PSdeG) e coa portavoz do BNG en Europa, Ana Mirada.
O encontro coincidiu coa chegada a Bruxelas do ex ciclista profesional Alejandro Paleo, que partiu en bicicleta o pasado domingo 3 de outubro da planta de Chavín rumbo á cidade danesa de Aarhus -onde Vestas ten a súa sede- para entregar aos directivos da multinacional unha carta en que o comité de empresa da fábrica de Viveiro solicita que non se feche a factoría.
O eurodeputado popular Millán Mon difundiu na súa conta de Twitter fotos do encontro co cancelo #VestasNonSePecha.
"Están a facer unha viaxe en bici de Viveiro a Aarhus por mor da intención de feche da fábrica de aeroxeradores da Mariña botando 115 traballadores", expresou.
Pola súa banda Ana Miranda urxiu á creación e aplicación dun plan de emprego e industrialización para A Mariña que evite que a comarca "se converta nun deserto industrial e demográfico".
A nacionalista urxiu a Xunta a paralizar o ERE, "pois non existe ningunha razón que o xustifique", dixo, en tanto se trata dunha planta que fabrica aeroxeradores. “É paradoxal que queiran fechar a fábrica cando se fomenta a instalación de parques eólicos”, dixo Miranda.
Aliás, urxiu o Goberno estatal a derrogar a reforma laboral, xa que se esta non estivese en vigor "o ERE non podería ser levado adiante" coa simple decisión da empresa.
O eurodeputado socialista Nicolás González lembrou que xa hai semanas que o seu grupo preguntou á Comisión Europea por este fechamento para saber as axudas recibidas pola empresa. "Non se entende fechar unha fábrica de renovábeis rendíbel en plena transición ecolóxica".
