Sen acordo para a alza do salario mínimo: CCOO e UXT critican que o Ministerio asuma a proposta da patronal

Os sindicatos estatais CCOO e UXT acusaron esta segunda feira o Ministerio de Traballo e Economía Social, liderado por Yolanda Díaz, de asumir a proposta da patronal española (CEOE e Cepyme), pois consideran que coa súa defensa de incremento do Salario Mínimo Interprofesional (SMI) de 4% "vén de asumir" a petición do empresariado. Así o afirmaron á prensa á saída da segunda reunión para a negociación da alza do SMI tanto a secretaria de Acción Sindical de CCOO, Mari Cruz Vicente, como o vicesecretario de Política Sindical de UXT, Fernando Luján, que viron moi similar a proposta de Traballo á da patronal, que apostaba por unha suba de 3%, con posibilidade de sumar até 1% en caso de desviación da inflación. Así, o Ministerio de Traballo e Economía Social propuxo a sindicatos e patronal un aumento do SMI de 4%, o que situaría a súa contía en 2024 en 1.123,2 euros ao mes en 14 pagamentos, fronte aos 1.080 euros actuais. A negociación polo salario mínimo remata sen acordo CCOO reiterou que a proposta de 3% "de partida" da patronal non é suficiente, porque non se pode saír por baixo do que vai ser a inflación deste ano e mesmo as previsións de inflación do ano que vén, e optaron por non precisar se aceptarán a aposta de 4% do Goberno español, sinalando que "se manteñen na súa actual postura", que en CCOO pasa por subir o SMI en 5%. UXT afirmou que "aínda" non se chegou a un SMI equivalente a 60% do salario medio, a pesar de que desde o Ministerio de Traballo sinalou na pasada reunión que o SMI actual xa está nesa porcentaxe e que agora todo consistía en "mantelo". "Nós entendemos que non chegamos, que estamos na boa senda e hai que valorar os esforzos que se fixeron en aras dese 60%", apuntou o sindicato. Unha posición, a de equiparar o SMI a 60% do salario medio estatal tal e como marca a Carta Social Europea, que vén defendendo desde hai moito tempo a CIG, excluída destas negociacións. Neste sentido, o sindicato nacionalista demandou esta segunda feira situar o SMI en 1.253 euros ao mes en 14 pagas, 130 euros mensuais por riba da proposta do Ministerio español de Traballo. Posturas enquistadas Desta maneira, a segunda xuntanza de negociacións para a suba do SMI rematou outra vez con posturas enquistadas. Os sindicatos estatais presentes na negociación volveron defender a súa aposta e sinalaron que "seguirán negociando" para que o SMI aumente máis que a inflación. Con todo, apuntaron que se non se alcanza un acordo será o Goberno español o que deba decretar unha porcentaxe de suba para que o 1 de xaneiro de 2024 os traballadores e as traballadoras afectadas polo SMI poidan saber canto van cobrar. 200.000 persoas na Galiza cobran un soldo inferior ao SMI Pola súa parte, fontes da CEOE indicaron que na reunión desta segunda feira foi informada a proposta do Goberno español e que a súa organización volveu pór sobre a mesa as mesmas formulacións que levaron á primeira reunión. A pesar do enquistamento das posicións e das críticas recibidas de aliñamento coa patronal, Yolanda Díaz asegurou esta segunda feira que o Executivo estatal está "perto" de alcanzar un acordo cos sindicatos e as patronais presentes na negociación para a suba do SMI de 2024 "porque as pretensións" das distintas partes non están "moi afastadas". "Estou plenamente convencida de que polo ben do país seremos capaces de conseguilo. Estamos moi próximos", sinalou a ministra española de Traballo en declaracións á prensa durante a súa asistencia á presentación do novo libro do presidente do Goberno do Estado español, Pedro Sánchez. Díaz indicou, ademais, que as partes negociadoras falan de estabelecer "condicións" para algunhas contratas administrativas públicas, para as que se pide a indexación do SMI. "Non somos competentes nesta materia, mais estamos dispostos a trasladar esta petición aos ministerios competentes. Por tanto, hai marxe para o acordo e que esas concesións administrativas que poidan ser revisadas, teño o compromiso de trasladalo aos outros ministerios", apuntou. Subsidios por desemprego Ademais, a vicepresidenta primeira e ministra de Economía, Comercio e Empresa, Nadia Calviño, afirmou esta segunda feira que o Executivo español está a traballar "moi intensamente" na reforma do subsidio por desemprego comprometida con Bruxelas e espera culminar o acordo entre o PSOE e Sumar "nos próximos días". Porén, o portavoz de Sumar, Ernest Urtasun, criticou esta segunda feira que o Ministerio de Economía remitiu ao de Traballo unha nova proposta de reforma do subsidio de desemprego que supón un recorte de prestacións, algo que non vai consentir a súa formación política, advertiu. A CIG pide equiparar pensións mínimas e SMI A pensión media na Galiza sitúase en 1.021 euros, das máis baixas do Estado A CIG demandou esta segunda feira a equiparación das pensións mínimas co Salario Mínimo Interprofesional (SMI) nunha cantidade que estipularon en 1.253 euros ao mes en 14 pagamentos, por ser 60% do salario medio español, como recomenda a Carta Social Europea. Para defender esta reivindicación, o colectivo de persoas xubiladas e pensionistas da CIG anunciou a convocatoria de mobilizacións para a vindeira quinta feira, día 14 de decembro, nas sete grandes cidades da Galiza.