Xurxo Carreño responde ás críticas por non se pronunciar sobre os incendios: "Queredes politizar todo, collóns!"
O creador de contido galego mantén que non ten obriga de opinar sobre a vaga de lumes e ataca quen lle pediu dar visibilidade á situación.
O influencer galego con máis seguidores, Xurxo Carreño, continúa no centro da polémica tras publicar un novo vídeo nas súas redes sociais en resposta ás críticas por non se pronunciar sobre a vaga de incendios que afecta Galiza desde comezos de agosto.
A secuencia, de poucos minutos, está dedicada a contestar unha moza que lle reprochou a falta de posicionamento público. A resposta de Carreño foi contundente e en ton bronco: “Fun limpar pellets porque me saíu das pelotas”, afirma, en referencia á súa participación nas tarefas de limpeza tras a vertedura de microplásticos a comezos de 2024.
O creador de contido continuou con mensaxes do mesmo estilo: "Como ti vés con toda a liberdade para vir pór comentarios e xulgar, tamén che digo: cala a boca e ponte a traballar".
Carreño insiste en que o seu labor nas redes sociais é "entreter" e non "informar" nin "facer xornalismo", polo que considera que non está obrigado a emitir opinións sobre cuestións como a vaga de lumes. "O 100% dos meus ingresos non ten que ver coa Xunta nin coa TVG", engadiu, para desmentir rumores sobre posibles vínculos económicos con institucións públicas.
"Non falei dos incendios, non falei da DINA... non tedes nin puta idea. Non falo porque vin xente que aproveitou as desgracias para ir a gravar vídeos, viralizarse e gañar seguidores. Tanto na DINA como nos incendios. E eu non quero formar parte diso", explica Carreño. "Intentades politizar todo, collóns! Que eu o único que quería dicir é que me están chegando ameazas".
"Que cona vou opinar?"
A polémica arredor da súa actitude comezou días atrás, cando milleiros de persoas usuarias cuestionaron o seu silencio en redes sociais a pesar da gravidade dos incendios. Nun primeiro momento, Carreño xa se pronunciara cun vídeo no que se preguntaba: "Que cona vou opinar?", argumentando que non quería tomar postura por non converter en contido unha situación dramática.
As críticas, porén, non remitiron e a súa nova resposta, en lugar de rebaixar a tensión, xerou máis comentarios. Nos perfís do creador acumuláronse centos de mensaxes, algúns defendendo a súa liberdade para non falar do tema e outros denunciando o ton “despectivo” cara ás persoas que lle pedían compromiso.
