O xulgado de Violencia sobre a Muller de Vigo acordou onte o ingreso en prisión provisional, comunicada e sen fianza, de Ángel R.D., investigado como suposto autor da morte da súa ex muller, Beatriz L.G., cuxo cadáver foi localizado na súa vivenda de Baiona o domingo pola noite, con varias feridas punzantes no corpo e un forte golpe na cabeza.
Segundo informou o Tribunal Superior de Xustiza da Galiza, como medida de seguridade e mentres dure a tramitación da causa, a maxistrada impúxolle unha orde de afastamento e a prohibición de comunicarse cos seus fillos, menores de idade.
Segundo explicou o avogado do investigado, Saúl Vidal, a Fiscalía tamén solicitou que se lle bloqueen as contas e o patrimonio para que poida facer fronte a unha eventual responsabilidade civil, así como que se lle manteña suspendida a patria potestade.
O crime
O crime sucedeu a última hora da tarde do pasado domingo, cando Ángel, profesor nun instituto de Redondela, chegou a casa da súa ex parella, en Baiona, para entregar os seus fillos.
O corpo da muller apareceu no acceso á vivenda, e presentaba múltiples cortes e picadas, así como, polo menos, un forte golpe na cabeza.
Tras o ataque, o sospeitoso levou os seus fillos, que presenciaron o ocorrido, a casa do seu pai, onde un dos menores relatou ao avó que o seu proxenitor matara á súa nai.
Despois de deixar os nenos, Ángel marchou e, horas despois, entregouse na Comisaría de Policía Nacional de Ourense, xa a segunda feira pola mañá.
A autopsia realizada ao corpo de Beatriz desvelou que sufriu numerosos cortes e picadas por todo o corpo (mans, brazos, pernas, tórax e costas), un desas picadas coa profundidade suficiente como para afectarlle ao fígado. Así mesmo, sufriu polo menos un golpe mortal na cabeza.
Os indicios apuntan a que neste ataque utilizáronse polo menos dúas armas: un coitelo de pequenas dimensións que foi localizado xunto ao corpo da muller, e outra arma máis contundente, tipo machada, que non foi encontrada.