A primeira vaga de calor do ano provocada pola entrada dunha masa de ar moi cálido procedente do norte de África disparará os termómetros por riba dos 30ºC na Galiza desde esta quinta feira e até, previsibelmente, principios da próxima semana.
As previsións apuntan a que no país e mais no litoral cantábrico as máximas alcanzarán valores superiores aos normais até o sábado, cando poderían superarse os 34 a 36ºC nalgunhas zonas do val do Miño. A partir do domingo comezarán a descender as temperaturas no extremo noroeste peninsular.
A calor e a crecente estabilidade chegará esta quinta feira despois de varias semanas de inestabilidade xeneralizada e provocará chuvascos, tormentas e temperaturas máis frescas do normal e consolidarase os seguintes días.
Un 2022 de récord
O verán climatolóxico de 2022 na Galiza foi "extremadamente" cálido no que atinxe ás temperaturas, cos valores medios máis altos da serie histórica. A este balance, publicado en setembro pasado por Meteogalicia, contribuíu especialmente o mes de xullo, marcado por varios episodios de calor extrema.
A media das temperaturas no conxunto do período situouse en 20,7 graos, é dicir, 1,6 graos por riba do habitual. A estación climatolóxica acabou rexistrando no seu conxunto as temperaturas medias e máximas máis elevadas de toda a serie histórica.
A cidade de Ourense foi protagonista o 12 de xullo após alcanzar a máxima temperatura desde que existen rexistros: un pico de 43,3 graos nunha das estacións meteorolóxicas do municipio.
