A cuarta edición do programa de ‘minicampamentos’ Coñece a Galiza, dirixida a menores de 10 a 14 anos de idade ofrece este ano un total de 600 prazas.
Estas actividades, que permiten estancias de cinco días en 12 estabelecementos hostaleiros da Galiza, poden solicitarse desde a vindeira segunda feira, 12 de xuño, e complementan a oferta de prazas dos campamentos de verán promovidos pola Xunta da Galiza.
As solicitudes poderán facerse a través do formulario que se habilitará na web de Xuventude e presentarse até que se esgoten as prazas ou até cinco días antes do comezo do 'minicampamento'.
Na edición do 2023, o programa incorpora dúas novas localizacións, o hotel Candor da Lama (comarca de Pontevedra) e o hotel Laias de Cenlle (O Ribeiro).
A estes establecementos sumánse os 'minicampamentos' de Valdoviño III (Ferrolterra), con actividades náuticas e sendeirismo, e Descubrindo a Bela Fisterra II, con actividades para gozar do medio mariño.
Tamén decorrerán os ‘minicampamentos’ A Conquista de Foz IV (A Mariña), con actividades de multiaventura e coñecemento do patrimonio; Aventura na Montaña IV, en Piornedo-Cervantes (Os Ancares); A Descuberta da Pobra do Brollón (Terra de Lemos), centrado no turismo de natureza; e o xeocampamento nas montañas do Courel (Quiroga).
En Ourense, desenvolveranse os 'minicampamentos' Somérxete na natureza III, na Pobra de Trives; Acción no Arnoia III, en Allariz e a súa contorna (Allariz-Maceda); e o de Laias en Cenlle, baixo o nome Ecoverán termal, e que inclúe actividades de natación e deportes náuticos no encoro de Castrelo de Miño.
Tamén haberá prazas para Aventura en Paradanta III, no Covelo (A Paradanta) e centrado en gozar do medio rural; Natura IV, en Sanxenxo (O Salnés); e a nova proposta de aventura e natureza na Lama.
