![[Imaxe: Erik Dobaño] Proceso participativo na Coruña](/asset/thumbnail,1280,720,center,center/media/nosdiario/images/2017/10/10/2017101019330537134.jpg)
En Compostela, as veciñas e veciños que en 2016 tomaron parte no proceso de decisión sobre unha pequena partida do orzamento municipal pediron un tractor para limpar estradas e camiños nas barriadas rurais. A compra do tractor está na fase de licitación. A semana pasada completáronse os encontros veciñais nas catro zonas en que se dividiu o proceso. Esta semana conclúe o prazo de votacións das propostas de 2017. A maioría demandan arranxos de rúas, fontes, mobiliario urbano, máis zonas verdes… O Concello puxo a disposición da veciñanza 1,5 millóns para investimentos.
Na Coruña, a primeira das propostas veciñais que se levou adiante foi a instalación, en maio deste ano, de aparatos de exercicio físico nun parque do barrio do Castrillón. Costou 7.800 euros e recibira 192 votos na primeira edición dos orzamentos participativos o ano pasado. Acaba de rematar o período de votación para as propostas deste ano. Presentáronse máis de 400. Unhas 3 mil persoas participaron no proceso, exclusivamente telemático. Hai 3 millóns para que a veciñanza decida que necesidades cubrir. A proposta de cidade máis votada (recollida de aceite doméstico, 580 apoios) levará un orzamento de 14 mil euros. Nos dez distritos en que se dividiu o proceso, a maioría das demandas refírense a melloras no alumeado, parques, instalacións deportivas, máis árbores e carrís para as bicicletas.
[Podes ler a reportaxe íntegra no número 267 de Sermos Galiza, á venda na loxa e nos quiosques habituais]
