Orzamentos mentireiros na sanidade pública

"De cando en vez di a verdade para que te crean cando mentes". Jules Renard (1864-1910), escritor e dramaturgo francés. Con motivo da presentación dos orzamentos do 2024, a bombo e prato, o ínclito señor conselleiro de Sanidade, mentindo unha vez máis, di que para o ano 2024, disporemos para a sanidade de 5.165 millóns de euros (70,4 millóns de euros menos que no 2023, descontando a inflación). Como sempre, fanse trampas a eles mesmos, pero á cidadanía xa non a enganan. Propoñen un orzamento menor que o existente no ano 2009, pois durante este tempo, tense que ter en conta o IPC e o aumento das consultas polo envellecemento da poboación e a maior demanda por temas tan importantes como a pandemia. O gasto en Atención Primaria vai ser de 1.582 millóns de euros. No 2009, foi de 1.909 millóns, unha vez sumada a inflación acumulada (33%). A sanidade pública na Galiza fica á cola do Estado en investimento por habitante (1.727 euros no 2022, 43 euros por baixo da media estatal, só por diante de Madrid. Que casualidade!). Sen remuda na privada Con respecto á falta de persoal, verdadeiro problema da sanidade pública galega, sábese que 433 médicos e médicas de Atención Primaria superarán a idade de xubilación en 2023, o que supón máis do dobre das novas prazas ofertadas (200). É dicir, se non hai un cambio estratéxico na política de persoal do PP, seguirán as reducións de persoal facultativo neste nivel asistencial. A Consellaría de Sanidade destinará 60 millóns en 2024 á creación de novas prazas en Atención Primaria (o que representa tan só o 1,1% do orzamento sanitario) das cales 200 serán de persoal médico (si, se 433 médicos e médicas de Atención Primaria superarán a idade de xubilación en 2023, son máis do dobre das novas prazas). Segundo datos do Ministerio de Sanidade o persoal médico de Atención Primaria que traballa na Galiza é de 2.768, o que representa un incremento de tan só un 7%, pese ás grandes necesidades do sistema tras os recortes dos últimos anos do PP. Acaba de licitarse á empresa privada a xestión das dúas residencias doadas por Amancio Ortega ao Goberno galego Residencias públicas Foi en febreiro de 2017, hai sete anos, cando Alberto Núñez Feijóo anunciaba que "construiría unha nova residencia de maiores en cada unha das sete cidades galegas, que sumarían máis de 900 novas prazas". Galiza está á cola de todas as comunidades autónomas en número de prazas públicas por persoas maiores de 65 anos. E cal é a realidade: sete anos despois recepcionáronse por parte da Xunta dúas residencias (a de Santiago a finais de outubro e a de Lugo en breve) mais "executadas pola Fundación Amancio Ortega". Cero residencias de maiores construídas polo Goberno Feijóo, que mente máis que fala! Pero é máis: a Xunta acaba de licitar á empresa privada a xestión das dúas residencias doadas por Amancio Ortega ao Goberno galego! Incrible pero certo. Poraas en mans dos herdeiros do antigo modelo de beneficencia clasista, beata e "sen ánimo de lucro". Na Galiza no ano 2022 hai 409 residencias de maiores: 213 están en mans privadas (52%) e 90 residencias en públicas (20%). Temos outras 106 (26%) de iniciativa social: Fundación San Rosendo, Acolle... Á cola do Estado Nun Estado laico como o español, Sanidade aumenta o gasto en capeláns (católicos) nos hospitais públicos: serán 770.000 euros en 2024. Ademais, o Sergas destina 3,7 millóns a sufragar persoal relixioso (católico, claro). Con respecto ao gasto sanitario público, en concertos coa boiante empresa privada, aumentará no vindeiro ano, ata os 227 millóns de euros. A maiores, fará o PP unha suba de 13,2 millóns, nun maior desembolso na privatización das ambulancias, hemodiálise e no concerto singular de Povisa. Como sabemos, primeiro déixase de investir no sistema sanitario público, logo este deteriórase e como consecuencia "privatizámolo". Estratexia neoliberal que lles funciona, pois a xente, sabéndoo, ségueos votando! É incongruente que o Estado español sexa o país da UE no que menos persoas acoden ó seu médico ou médica de familia. Ocupamos o último lugar da lista, co 20,9% de utilización media, fronte ao 32,5% europeo e tamén estamos nas últimas posicións en consultas á especialistas con 9,5% por habitante ao ano, fronte ao 19,5% da media europea. En conclusión, a Xunta do PP, non ten ningunha vontade de solucionar as graves deficiencias da sanidade pública galega e continúa coa súa estratexia de mentiras, propaganda e confusión.