Máis de sete horas de agarda para facer probas PCR

Ás portas da Noiteboa, cos contaxios da Covid-19 disparados (1.631 novos casos comunicados polo Sergas na cuarta feira) e co desabastecemento de probas de antíxenos nas farmacias galegas, este 22 de decmebro viviuse unha xornada de "caos" en varios puntos da Galiza debido á falta de previsión de Sanidade nos dispositivos de probas PCR gratuítas e sen cita previa habilitados pola Xunta. Os tempos de agarda chegaron a superar as sete horas en localidades como Vigo. A queixa máis escoitada nas fileiras de persoas que agardaban pola proba cargaba contra a falta de persoal sanitario mobilizado nestes postos. Desde hai uns días a web de cribado do Sergas deixou de ter dispoñíbel a posibilidade de pedir cita previa para acudir aos postos de probas PCR gratuítas dispostas en varios concellos galegos. Até hai pouco, podíase ir con ou sen cita. Agora, só funciona sen cita, polo que abonda con acudir ao posto e facer cola. Así, estes puntos de cribado sufriron este 22 de decembro o seu maior colapso, impulsado polo esgotamento dos tests de antíxenos nas farmacias. O punto de PCR gratuíta no Náutico de Vigo abre ás 9 da mañá. Ás 8.30 xa había xente agardando. María, veciña de Vigo, chegou ás 9 horas coa súa parella, Alessandra. Até as 16.45 da tarde non foi atendida (7,45 horas de agarda). Foron previsoras: levaron comida da casa e mesmo cadeiras pregábeis. Non foron as únicas en facelo. Patricia chegou ás 13 horas ao posto situado no Hospital de Pontevedra, tiña unhas 300 persoas por diante, e tivo que agardar até as 17.50 para que lle realizasen a PCR (4.50 horas de pé á espera). Lucía foi acudiu antes que ela ao posto de Pontevedra, ás 10.15 da mañá xa estaba alí. Ás 14 horas tiña aínda 30 persoas por diante e o posto fechou para que as enfermeiras puidesen xantar. O Sergas non organizou quendas ao mediodía nin preveu persoal de relevo. Reabriron ás 15.30 horas. Non foi atendida até as 16.15 da tarde (6 horas de agarda). Iria acudiu este 22 de decmbro ao posto de PCR sen cita previa do Complexo Hospitalario de Santiago. Xa estivera o día antes sen éxito. Media tarde facendo cola para volver a casa sen a proba. En Compostela, o posto fecha ás 21.30 horas e as enfermeiras non puideron atender a cantidade de persoas que acudiu. O mesmo aconteceu antonte en Pontevedra, onde ducias de persoas que levaban toda a tarde agardando quedaron sen poder someterse á PCR ao fechar o posto á noitiña. Alba pregúntase por que non hai un servizo de orde que reparta tickets por orde de chegada até un tope. "Así saberíamos canta xente temos por diante", di, botando en falta persoal do Sergas que informe a xente de que, a partir de certo número, terían posibilidades de ficar sen a proba. O punto álxido en Compostela viviuse a primeira hora da tarde, cunhas 900 persoas facendo cola e o persoal de seguridade, desbordado, informando de que xa non se permitía que novas persoas se sumasen á fileira. "Tan só hai catro enfermeiras facendo PCR", denunciaron varios veciños de Compostela nas súas redes. Vigo avanzou o colapso mais Sanidade obviouno Antonte, o conselleiro de Sanidade, Julio García Comesaña, anunciou que reabrirían os puntos de probas PCR en 14 puntos da Galiza. Para realizalos, dixo, non sería necesaria cita previa. A medida foi presentada como unha grande aposta da Xunta para frear o virus no Nadal. Na área sanitaria de Santiago-Barbanza iniciou a campaña antonte, con cribados no hospital de Santiago e no de Ribeira. Na zona de Vigo, ao ser a área con máis contaxios, o punto de PCR gratuíta leva semanas activo no Náutico. Porén, pese ás longas colas rexistradas neste emprazamento nas últimas semanas, a Xunta non puxo para estes días de Nadal persoal suficiente nin na cidade olívica nin nos novos puntos que foi abrindo no país. O pasado 11 de decembro as queixas xa eran públicas en Vigo: "Varias horas de cola para facer unha PCR no Náutico entre outras razóns porque o Sergas non cobre o persoal sanitario na súa hora de xantar. Persoas de idade avanzada tamén aquí", escribía nas súas redes a edil viguesa Oriana Méndez hai 12 días. Récord de contaxios na Galiza e no Estado Os contaxios da Covid-19 continúan a dispararse. Este 22 de decembro marcouse novo récord: o Estado superou o máximo de casos diarios por segundo día consecutivo con 60.041 contaxios (37.609 notificáronse onte) e o Sergas comunicou 1.631 novos casos na Galiza (591 máis que na xornada anterior), de maneira que o número de persoas coa enfermidade elévase a 17.227 no territorio galego (974 máis que no día antes, descontando as altas epidemiolóxicas e os falecementos). Os novos contaxios subiron en todas as áreas sanitarias, especialmente na de Vigo, onde se concentra máis dun terzo dos casos diagnosticados nas últimas horas. Así, nesta área detectáronse 594 casos novos e o número de persoas coa infección ascende a 5.706. En canto ao incremento de casos nas últimas 24 horas, a directora xeral de Saúde Pública, Carmen Durán, explicou que posibelmente se deba a unha combinación de factores, como a interacción social nos festivos de decembro e a expansión da variante Ómicron, aínda coa Delta predominante na Galiza. Así, con estes factores, evidenciou a dificultade de sinalar o pico da pandemia e sentenciou: "Esperamos o mellor, pero estamos preparados para o peor". Catro novos falecementos Os últimos decesos comunicados polo Sergas corresponden a unha muller de 66 anos de idade no Complexo Hospitalario de Vigo, un home de 69 anos no hospital de Lugo, outro de 91 no Complexo Hospitalario da Coruña, e mais outro home de 91 anos no hospital de Pontevedra. Incidencia en 15% En canto á positividade das probas PCR (o número de tests positivos por cada cento de probas realizadas), o Sergas notificou unha positividade nas últimas horas de 15%, moi por riba do 5% que fixa a Organización Mundial da Saíde (OMS) como limiar para dar por controlada a pandemia. Aliás, os datos do Ministerio de Sanidade (actualizados a 22 de decembro) sitúan a incidencia acumulada a 14 días na Galiza en 627,24 casos por 100.000 habitantes, mentres que a media do Estado está en 784,20. O ensino fecha o trimestre con máis de 3.000 casos A incidencia do coronavirus nos centros educativos e escolas infantís da Galiza mantense á alza e, segundo os datos publicados pola Xunta esta cuarta feira, este primeiro trimestre do curso rematou con 2.997 casos en colexios e institutos, e outros 62 en escolas infantís. A situación obrigou a fechar 159 aulas nos primeiros centros e 26 aulas nas escolas infantís. Os casos de Covid-19 nos centros subiron en 406 na última semana