A inmatriculación converte a Igrexa na "maior inmobiliaria galega": 4.000 predios

A Igrexa católica rexistrou como propios máis de 7.000 bens na Galiza desde 1998, cando o Goberno de Aznar legalizou a Lei Hipotecaria franquista que permitiu á institución relixiosa rexistrar propiedades. Por volta de 4.000 deses bens, segundo os datos do Goberno español, son predios, soares, vivendas, terreos, garaxes... O que leva a Luis Bará, deputado do BNG, a afirmar que "a Igrexa católica é a principal inmobiliaria da Galiza" e actúa "como tal", vendendo, permutando... Estes días, e após a xuntanza entre o presidente do Goberno español, Pedro Sánchez, e Juan José Omella, presidente da Conferencia Episcopal Española, a Igrexa recoñeceu dúbidas sobre 0,1% das propiedades inmatriculadas na Galiza, 9 de 7.000, e abriuse á súa devolución. Porén, esta cifra é "ridícula" ou "moi baixa" para colectivos e organizacións que loitan por reverter este proceso de rexistro por parte da Igrexa. Como a coordinadora Recuperando, que denuncia que "o Goberno español negociou na máis absoluta opacidade cos bispos a saída en falso dun problema de Estado e que representa unha amnistía rexistral". "Hai que derrogar iso" Luis Bará levou ao Parlamento galego o debate das inmatriculacións en varias ocasións. En conversa con Nós Diario lamenta o "verniz" que di que se quere dar á Igrexa co anuncio da devolución desa cativa porcentaxe de bens rexistrados. "Non hai que ir a unha negociación, hai que anular un procedemento que foi censurado polo Tribunal de Estrasburgo". "Hai dous supostos nos que deberían anularse xa esas inmatriculacións: os de dominio público e aqueles nos que non acredite a titularidade", explica. O deputado nacionalista non pon cifras, "non é doado: hai que ir mirando un por un", mais apunta a que suman unha cantidade elevada, máis que as 9 que recoñece a Igrexa. A deputada socialista Paloma Castro resaltara no seu día que "tivo que chegar o goberno de Sánchez para dicir á Igrexa que todos somos iguais". Desde o PP, porén, o deputado Alberto Pazos defendeu que a lei de Aznar non implicou "ningún privilexio" para a Igrexa católica.. O avogado Pérez Lema, pola súa parte, incide naqueles bens e propiedades que, aínda tendo un carácter "relixioso", non poden considerarse inmatriculados pois a Igrexa non pode outorgarse a propiedade sobre eles. Abundan na Galiza e están en terreos veciñais ou de man común: capelas, ermidas, adros... "Hai xurisprudencia na que se estabelece a propiedade dos veciños ou dos comuneiros sobre eses bens", indica. O letrado lembra que os terreos ou en man común (700.000 hectáreas na Galiza, 25% do territorio) "non se poden vender, nin embargar, nin doar, nin transferir...", polo que, conclúe, "a Igrexa non pode arrogarse a propiedade: non puido compralos, nin herdalos...". Proceso xudicial Que deben facer as asociacións que vexan que nesas 7.000 propiedades inmatriculadas figuran bens nos seus terreos e queiran recuperalos? "Presentar unha demanda reivindicando a propiedade ", proceso que se pode alargar "de oito meses a un ano", ao que engadir os meses das alegacións e o proceso de casación ante o Tribunal Superior de Xustiza da Galiza (TSXG).