Galiza, no podio da poboación que vive en inmóbeis “con deficiencias”
Duplica a porcentaxe de persoas que na UE habitan un inmóbel nesa situación.
Unha de cada tres galegas e galegos viven en fogares “con deficiencias”. 33,4% da poboación na Galiza vive en fogares cuxa vivenda presentaba deficiencias –como pingueiras, humidades en paredes, chans, teitos ou cimentos, ou podremia en chans, marcos de xanelas ou portas–.
Así o recollen os datos do Instituto Nacional de Estatística (INE) correspondentes a 2023 – último ano fechado- que sitúa a Galiza como o terceiro territorio do Estado con maior porcentaxe de poboación nesta situación, só superada por Ceuta (39,1%) e as illas Canarias (34,4%).
A media do Estado español de poboación que habita en fogares nesta situación é de 22,9%, o que supón 10,4 puntos menos que na Galiza.
No conxunto da Unión Europea é 15,5% da súa poboación a que vive en vivendas con deficiencias, polo que a porcentaxe da Galiza supón duplicar a comunitaria.
Segundo o INE, en 2003 a poboación galega residía en fogares cuxa vivenda presentaba deficiencias era 24,5% do total, mentres que na Unión Europea a media situábase daquela en 20,6%.
Así pois, a evolución destas dúas décadas (2003-2023) indica que mentres na UE se reduciu a porcentaxe de persoas que habitaban vivendas con deficiencias en cinco puntos, na Galiza produciuse o contrario e aumentou a poboación nesta situación en case nove puntos.
