Con motivo do Ano das Irmandades, proclamado pola Xunta de Galiza como tal co gallo do centenario da primeira xuntanza en 1916 na Academia Galega, Ora galega está a desenvolver a organización dunha exposición itinerante que levará a 16 puntos do país.
No concreto, o material --gráfico, documental e audiovisual-- será exposto nun autobús de estilo inglés "con dous andares" e adaptado para tal fin que percorrerá 712 quilómetros en 8 fins de semana.
O itinerario desenvolverase durante os sábados e domingos e levará a exposición a 16 localidades
O itinerario comezará na cidade da Coruña para continuar por Betanzos, Ferrol, Ortigueira, Viveiro, Ribadeo, Vilalba, Mondoñedo, Lugo, Monforte, Ourense, Ribadavia, Ponteareas, Vigo, Pontevedra, Vilagarcía, A Estrada, Lalín, Compostela e, de novo, A Coruña.
Oito semanas
Arrincará a fin de semana posterior ao Día das Letras Galegas (21 e 22 de maio) e rematará a segunda fin de semana de xullo (9 e 10). A escolla dos distintos puntos da xeografía galega nos que aparcará o autobús respondeu a aquelas localidades que "tiveron Irmandades da Fala, máis ou menos activas", explica Vitor Vaqueiro desde Ora galega en conversa con Sermos Galiza.
Desde a organización procuran agora apoios para continuar coa programación de actividades aproveitando a estadía da exposición nos distintos lugares. Até o momento contan coa colaboración da Deputación da Coruña que se implicou de cheo na conmemoración do centenario das Irmandades. Neste senso, están a desenvolver encontros con outras administracións como o Concello de Compostela onde tiveron conversas co alcalde, Martiño Noriega.
O obxectivo, sinalan desde Ora galega, é "dar a coñecer" a loita das Irmandades e o papel que xogaron na contrución do nacionalismo galego e a defensa de Galiza.