A aparición de novos gromos de coronavirus é unha realidade en toda Galiza malia que os puntos máis febles sexan os centros residenciais. Tanto é así que mesmo nas instalacións sanitarias danse contaxios. Esta sexta feira comunicouse a aparición de seis casos positivos na área de Traumatoloxía do hospital de Lugo.
Neste departamento do Hospital Universitario Lucus Augusti (HULA) deuse un contaxio co virus que afecta a seis persoas, catro das cales son persoal sanitario.
En concreto, dous dos casos positivos son de doentes atendidas nesa área, e tamén comprobouse a afección a un médico e tres auxiliares.
Fontes da área sanitaria de Lugo explicaron a Europa Press que o gromo foi descuberto esta terza feira pero xa está "todo controlado". Así se conseguiu actuando "segundo o protocolo". É dicir, as cinco persoas atópanse en corentena.
Por mor da detección deste punto de expasión do virus, o equipo sanitario investiga quen puido a ou o paciente cero e de que modo se puido introducir o virus no servizo de Traumatoloxía.
Á marxe deste caso sucedido no interior da instalación, o hospital lucense está a ser un centro bastante afectado pola pandemia dado que alí faleceron algúns dos usuarios das residencias do Incio e Outeiro de Rei, entre outras vítimas do total galego desde que comezou a alerta sanitaria.
![Zona queimada por un incendio en Crecente (A Paradanta). [Imaxe: Adrián Irago / Europa Press]](/asset/zoomcrop,480,270,center,center/media/nosdiario/images/2024/05/01/2024050121174923623.jpg)