A débeda pública galega sitúase en 12.165 millóns de euros, 8.500 millóns máis que en 2009
O Goberno galego debe 1.906 millóns de euros correspondentes a diversas actuacións financiadas pola modalidade de colaboración pública-privada.
O Banco de España presentou esta sexta feira as cifras de débeda das comunidades autónomas correspondentes ao terceiro trimestre de 2024. Nas mesmas, o regulador estatal sinala que a Galiza rexistra unha débeda pública a 30 de setembro de 12.165 millóns de euros.
A débeda pública galega tense incrementado desde 2009, ano da chegada do Partido Popular ao Goberno galego, en 8.571 millóns de euros. Se á volta do primeiro trimestre desa anualidade sumaba 3.954 millóns e equivalía a 6,8% do produto interior bruto (PIB) da Galiza, a finais de setembro de 2024, último mes con cifras, chegaba a 12.165 millóns de euros, representando perto de 17,4% do PIB.
O Goberno galego debe, a maiores, 1.906 millóns de euros correspondentes a diversas actuacións financiadas pola modalidade de colaboración público-privada. Precisamente, esta fórmula, moi criticada polas forzas da oposición, responde ao obxectivo de non computar a efectos contábeis como débeda pública diversos investimentos do Goberno galego.
O recurso á colaboración público-privada para execución de diversos actuacións públicas xera un aumento no custo das obras, como denunciou o Consello de Contas no mes de xullo en relación co Hospital Álvaro Cunqueiro de Vigo
