As autoridades sanitarias veñen de notificar dez novos pasamentos derivados das complicacións en pacientes infectados polo coronavirus na Galiza. Con esta nova cifra, a máis alta das últimas xornadas, a Covgid-19 xa causou 1.380 víctimas desde marzo.
Porén, a Xunta aclarou que o balance non é só de hoxe senón tamén de decesos que tiveron lugar durante a fin de semana e non se comunicaran antes. Porén, segue a ser unha dos datos máis elevados pois onte, por exemplo, falouse dun único óbito.
A Consellaría de Sanidade explicou que houbo catro pacientes falecidos no Complexo Hospitalario Universitario de Santiago (CHUS). Neste caso foron un home de 84 anos e tres mulleres, de 88, 87 e 77 anos de idade.
Aliás, no centro hospitalario Virxe da Xunqueira de Cee producíronse tres mortes máis: un varón de 64 anos, unha doente de 73 e outro home de 84 anos.
Dáse a circunstancia de que estas dúas últimas persoas foran trasladadas ao hospital desde a residencia DomusVi de Vimianzo, afectada por un gromo.
Unha infectada que permanecía ingresada no Complexo Hospitalario Universitario da Coruña (Chuac) tampouco foi quen de superar o virus. O mesmo sucedeu cun paciente do hospital Povisa, de Pontevedra, que tiña 68 anos.
Por último, tívose coñecemento dun finado de 71 anos que era atendido polo persoal sanitario do hospital de Ferrol.
