O mozo ferido no sinistro rexistrado a pasada cuarta feira nun paso a nivel en Lugo, onde un tren impactou cun coche con tres ocupantes -dous deles falecidos-, continúa na UCI no Hospital Universitario Lucus Augusti (HULA) na mañá desta quinta feira.
Segundo informaron fontes sanitarias, o ferido está "estábel e evoluciona favorabelmente". Dous mozos de 19 e 21 anos de León faleceron neste sinistro.
O sinistro produciuse ás 9.16 horas por un tren de Media Distancia que cubría a liña A Coruña-Monforte de Lemos -punto quilométrico 424,010-. Trátase dun paso a nivel sen barreiras, con sinais de stop e de aspa.
Os ocupantes
Os ocupantes do coche participaban na obra dun centro asociado á subestación de Adif de Oural (Lugo), no marco da electrificación da liña Ourense-Monforte-Lugo, e pertencen á empresa Telice.
Os tres novos que viaxaban no coche eran estudantes do CIFP Tecnolóxico de León e atopábanse realizando prácticas curriculares de formación na empresa tecnolóxica Telice.
A empresa Telice, onde os mozos realizaban prácticas desde o mes de maio mediante un acordo de colaboración coa Xunta de Castela e León, manifestou as súas "máis sinceras condolencias ás familias e seres queridos" das vítimas e a súa solidariedade "nun momento de profunda dor".
