Concentración en Ourense ao berro de "lumes nunca máis" no medio da vaga de incendios

Decenas de persoas concentráronse esta quinta feira en Ourense ao berro de "lumes nunca máis" nunha nova xornada de incendios na provincia. Na concentración, convocada por Amigas das árbores, reivindicouse un "monte galego con futuro".

O acto decorreu na Praza Maior da cidade, pola que se espallaron cinzas a modo de protesta, para mostrar a súa solidariedade co persoal de extinción, así como o seu rexeitamento aos incendiarios.

Nesta liña, comezouse rendendo un minuto de silencio e reflexión polos bombeiros feridos en Oímbra e os dous homes falecidos en León. Tras el, xurdiron diversos berros en defensa do ecosistema galego. "A Xunta é responsábel do noso inferno", denunciaron.

Ademais, redactouse un manifesto no que lamentan as "miles de hectáreas arrasadas, calcinadas sen ser capaz de facerlle fronte ao lume. "Gran parte destes espazos quedarán tinguidos de negro, en forma dun 'Prestige de interior' que vai deixar tras de si unha paisaxe desoladora e unha terra devastada" subliñan.

A seguir, remarcaron que "xa abonda de tanta manipulación e de propaganda baleira sobre o rural", xa que "non queren que o monte sexa pasto do lume e a especulación".

Por iso, esixiron de novo o "reforzo especial" dos dispositivos de prevención e extinción nos espazos naturais de "maior valor" ecolóxico e ambiental; a creación dun único servizo público de prevención e extinción.

Ademais da declaración de 'zona catastrófica' das áreas afectadas; accións inmediatas nas zonas queimadas; a suspensión da tempada de caza e pesca para rexenerar as poboacións salvaxes, e a creación de políticas estruturais que "preserven a biodiversidade".

Con todo, concluíron mostrando o seu apoio ás poboacións afectadas asegurando que "non están soas".