O Concello de Santiago solicitará á Delegación do Goberno a colaboración dos antidisturbios da Policía Nacional con "carácter disuasorio" contra botellóns e concentracións nocturnas. "Conto con ter reforzos esta quinta feira", dixo o alcalde,Sánchez Bugallo.
Co obxectivo de concretar este dispositivo, avanzou que haberá nos próximos días unha reunión entre o concelleiro de Seguridade Cidadá, Gonzalo Muíños, e a subdelegada do Goberno na Coruña, María Rivas.
Na rolda de prensa posterior á xunta de Goberno local desta segunda feira, o rexedor compostelán manifestou a "enorme preocupación polo problema de convivencia" que afirma que xeran estes episodios. O máis grave ocorreu na noite da quinta á sexta da pasada semana, na que se produciron cargas policiais para disolver un botellón con 2.000 mozos á saída dunha discoteca.
Con todo, Bugallo sinalou que non é un asunto "excepcional de Santiago", senón que outras cidades, entre as que mencionou Madrid ou Barcelona, teñen "problemas de magnitudes moito maiores".
Tras as críticas da oposición á xestión destes incidentes por parte do Goberno municipal, recoñeceu que hai que "mellorar" e "aprender de cada unha das experiencias". Pero tamén sinalou que os efectivos da Policía Local son "moi limitados":
Pola súa banda, o PP mostrou o seu "apoio" aos policías nestes días "desagradábeis" e "un tanto difíciles". Así mesmo, o seu portavoz municipal, Alejandro Sánchez-Brunete, reclamou para os veciños das zonas afectadas un "resarcimento económico" que pode chegar en forma de responsabilidade patrimonial do Concello ou por "bonificacións" ao IBI.