A Organización Galega de Comunidades de montes en man común e o sindicato agrario Fruga convocaron unha manifestación para o vindeiro sábado, 22 de novembro, unha mobilización que decorrerá en Compostela co lema ‘Defende os froitos dos nosos montes’. O motivo de saír á rúa é a nova lei de montes de Galiza (Lei 7/2012), que na súa disposición transitoria novena indica que se en agosto de 2016 as comunidades que teñen os seus montes con convenios ou consorcios non pagan as débedas estarán obrigadas a asinar un contrato cunha empresa forestal privada.
Mais, existe ese saldo deudor? Desde a organización de montes veciñais en man común lembran que no franquismo o monte veciñal foille roubado aos veciños comuneiros, para ser entregado a diversas administracións públicas. Xa nos postfranquismo procedeuse á devolución, nalgúns casos incompleta, aparecendo a figura dos consorcios e dos convenios. “A administración forestal nunca presentou as contas claras e cando se ve obrigada a presentalas resulta que as e os comuneiros sempre resultan debedores da administración”.
Os montes veciñais en mao común ocupan 1/3 do territorio da Galiza e están xestionados por unhas 3.000 comunidades, que reúnen aproximadamente uns 250.000 veciños e veciñas comuneiras. O monte veciñal é unha seña de identidade propia de Galiza, somente hai esta figura no noso país e no norte de Portugal.
Condonación
A lei de montes do estado Español (lei 43/2003) permite a condonación das débedas dos montes conveniados ou consorciados, sempre que o titular da terra se comprometa a xestionala mediante un instrumento de xestión. “Non hai ningunha razón legal, xurídica e técnica que impida condonar as débedas do monte veciñal conveniado ou consorciado", afirman desde a organización de montes veciñais..
