'Coles negros', concentracións e camiñadas contra os recortes de profesorado

Os recortes en educación son recortes no futuro das crianzas. Aféctannos a todas", sostén Begoña Besada, presidenta da Anpa A Rabadela do CEIP A Igrexa Calo, no concello de Teo, un centro do rural da comarca de Compostela que este curso conta cunha liña menos en 4º de Primaria e fica con dúas aulas "no límite da capacidade legal". É un dos moitos casos que "recorte" que están dando a coñecer sindicatos, Anpas e equipos directivos de centros educativos de todos os niveis para exixirlle á Consellaría de Educación máis recursos humanos que favorezan unha mellor organización e calidade educativa. "Cada escola ten as súas peculiaridades e manifesta unha capacidade de loita distinta". Todas suman e responden a unha necesidade real, afirma Besada, quen neste punto avoga por dar un paso adiante que faga visíbel "a protesta común" que ocupa a maioría de colexios e institutos da Galiza que viron diminuídos os seus cadros docentes. Coles negros Esa iniciativa leva por nome 'coles negros' e ponse en marcha esta quinta feira, 23 de setembro. A proposta chama ao conxunto da sociedade a vestir de negro cada quinta feira para pór de manifesto os prexuízos dunha educación pública falta de recursos que compromete o futuro de nenos e nenas. "Convidamos a persoal docente e non docente dos centros, familias, estudantes e veciñanza a que manifesten na rúa a loita en loito que estamos a manter", alenta a voceira da Rabadela, "porque ao final, o dano é para toda a sociedade, a de hoxe e a do futuro". No caso de Calo, o alumnado que o curso pasado dispoñía de tres espazos diferenciados para a súa formación, este ano reagrupouse en dous, con ratios de até 25 estudantes, que é o límite que estabelece a normativa neste nivel. "Dáse a casualidade de que nesta liña hai unha porcentaxe de nenos e nenas con necesidades educativas especiais que supera 10%, moitas delas con necesidades severas", sinala Begoña Besada, quen cuestiona as condicións de acceso nas que quedan os dous grupos que ordenou a Consellaría á mellor atención educativa. "Falamos dunha liña especialmente sensíbel que se chegou a desdobrar con anterioridade, mesmo estando por baixo da ratio legal. Precisamente porque era imposíbel atender as particularidades e as necesidades específicas das crianzas, con docentes desbordados e de baixa". Agora, sen cambios nas cifras nin no alumnado e aínda en pandemia, Calo conta unha aula e tres mestres menos. Unión de Anpas contra os recortes Na comarca do Barbanza, as Anpa de nove centros educativos do concello de Ribeira de Infantil, Primaria e Secundaria veñen de asinar un manifesto conxunto que certifica a súa unión fronte aos recortes de profesorado da Xunta. Foron, tamén das primeiras en se sumar á iniciativa dos 'coles negros' que buscan estender por todo o territorio, fartas da perda de docentes e do baleiro que deixa nos centros. "Vestiremos loito porque a educación pública de calidade está a morrer", cunha perda na comarca de perto de medio cento de docentes, sinala a Nós Diario Paz González Riobó, presidenta da Anpa Caramecheiro do IES Nº 1 de Ribeira e da do CEIP de Palmeira. Mais tamén pola "actuación unilateral" da Administración, que mudou a organización dos centros de costas á comunidade educativa, unánime contra os recortes. "Vive nun mundo de números; mentindo, omitindo e terxiversando unha realidade que nada ten que ver coa nosa", tomando decisión que "poñen en xogo o futuro de moitas xeracións de galegos e galegas", afonda. Neste sentido, González Riobó salienta mudanzas no funcionamento dos centros de Ribeira que afectan ás horas de apoio educativo, á oferta de materias optativas e mesmo á dispoñibilidade dos docentes, chamados a cubrir ausencias en distintos centros. "Un caos organizativo co que buscan agochar a falta de cobertura de prazas estruturais". Ir e vir de docentes Se en Ribeira son os colexios de Artes e Carreira os que comparten docentes, en Compostela sono os de Fontiñas e Montes dos Postes, cuxas Anpa organizaron a pasada cuarta feira unha andaina reivindicativa entre ambos os dous centros para exixirlle á Consellaría que corrixa a falta de persoal e as eivas educativas asociadas. Catuxa Lombao, membro do consello escolar do CEIP das Fontiñas explica a este xornal o trastorno que está a supor para estudantes e docentes o ir e vir diario de tres profesores dunha escola a outra. "Temos 13 aulas de primara e 12 titores, porque o dun 2º é compartido con outro do Montes dos Postes, ao igual que compartimos un especialista en Pedagoxía Terapéutica e outro en Audición e Linguaxe", co agravante, engade, "de que todo o alumnado que se matriculou no centro no período extraordinario ten necesidades educativas específicas e fica sen atención suficiente". "Non ten sentido que, en plena pandemia, os nosos fillos non poidan xogar xuntos no recreo pero os mestres poidan ir e vir dun centro a outro incrementando as posibilidades de que apareza un gromo", polo que seguirán a reclamar ante Xunta. Nin o profesorado que fixa a 'lei' Como veñen facen nai e pais do CEIP Ramón de la Sagra da Coruña, que onte se volveron congregar diante da delegación de Educación para reclamar o docente que lles falta por mandato da propia Administración. "O DOG di 11 docentes e nós temos 10", resume Gemma Pérez secretaria da Anpa Rasa. "Estamos sen un titor de 1º. E iso supón que o centro ten que facer un encaixe de bolillos para que as crianzas teñan sempre un profesor". Na práctica, afonda a representante da Anpa, "isto prexudica ao resto da comunidade educativa ao reducir en 18 as horas de apoio educativo e especialidades que se deberían estar impartindo". O único que reclaman, di, é "que se cumpra a lei" para non danar mais o alumnado, polo que non conciben o silencio da Xunta nin a tardanza en repoñelo.