A CIG xustifica a súa condición de interesada nas alegacións ao proceso de autorización da celulosa de Altri
A CIG anunciou esta segunda feira que vén de xustificar a súa condición de "interesada" no procedemento de autorización do proxecto da celulosa que Altri quere instalar en Palas de Rei (A Ulloa), logo do requirimento remitido pola Secretaría Xeral de Industria e Desenvolvemento Enerxético da Xunta da Galiza.
O sindicato denuncia a pretensión do Goberno galego, cunha campaña masiva de requirimentos a alegantes, de "calar e deixar fóra do procedemento administrativo as persoas e os colectivos alegantes", unha actitude "inaudita" coa que "pretende amordazar as persoas que rexeitan que se autorice a planta de produción de fibras téxtiles a base de celulosa tan daniña, non só para a súa contorna, senón para todo o país". Para a central sindical esta actuación demostra o "talante antidemocrático do Goberno de Alfonso Rueda", que "incumpre" o artigo 53 da lei que estabelece a condición de persoas interesadas nun procedemento administrativo.
Tamén denuncian que a Xunta da Galiza está a incumprir a Constitución española, en concreto os artigos 15, 43.1 e 45.1, que preservan "os dereitos á vida e á integridade física, á protección da nosa saúde, a desfrutar dun medio ambiente axeitado para a saúde das persoas e a preservar o uso de diñeiro público ante o intento de Altri e da Xunta de Galiza de obter financiamento das Administracións públicas".
Mobilización o 15-D
A CIG denuncia o "perigo" que supón Altri para o tecido económico e social; para a poboación das comarcas polas que discorre o río Ulla; para os sectores do mar que viven da ría de Arousa, que están totalmente afectados por este proxecto que ameaza o seu futuro e para o conxunto de Galiza, porque "o proxecto da macrocelulosa de Altri implica mudar o modelo de país e por tanto aféctanos a toda a cidadanía".
Diante desta situación a CIG, xunto coas plataformas e colectivos implicados nesta loita, súmase ao chamado a participar na mobilización nacional convocada para o 15 de decembro en Compostela baixo o lema 'A Xunta non poderá calar todo un país. Altri non!', da que agardan que sexa "unha nova demostración da contestación social" á macrocelulosa.
"Ante o desprezo do Goberno galego a informes científicos como o do Consello da Cultura Galega, a pretensión de silenciar o clamor social contra Altri e a obsesión de Alfonso Rueda por priorizar os intereses particulares dunha empresa no canto de defender as galegas e os galegos, o noso territorio e os nosos sistemas produtivos só queda saír ás rúas", sinala o sindicato nacionalista.
