A CIG-Ensino mobilizarase ante "os recortes e a censura"

A nova secretaria nacional da CIG-Ensino, Laura Arroxo, compareceu onte acompañada de Marta Ferreiro e Diego Boquete, membros da Executiva, para anunciar a convocatoria dunha mobilización o 25 de xuño ás 12 horas ante a Consellaría de Educación nos Edificios Administrativos de San Caetano, en Compostela.

Diego Boquete, Laura Arroxo e Marta Ferreiro, na sede da CIG-Ensino en Compostela, o 11 d xuño. (Foto: Arxina)

A. E.

11/06/25 | 22:12 | Tempo de lectura: 2 min.

"Rectificar, recuperar e recoñecer son as tres palabras coas que queremos dirixirnos á Consellaría e que explican a mobilización que agora anunciamos para o 25 de xuño", explicou Laura Arroxo ao inicio da súa intervención en rolda de prensa en Compostela, esta cuarta feira. Para a responsábel do ensino na central nacionalista é "fundamental" que a Xunta da Galiza "rectifique e deixe de ter á deriva o ensino público, particularmente nas condicións laborais do profesorado". Sinalou que "hai que recuperar os dereitos perdidos cos recortes que se aplicaron" e exixiu "que se recoñeza a profesión docente e, polo tanto, que se teña en conta a súa opinión á hora de tomar as decisións".

Con todo, esta rectificación, para Laura Arroxo, tamén ten que vir por parte "dos sindicatos que traizoaron a vontade do persoal docente asinando un acordo que se amosou nefasto por hipotecar a varios anos vista calquera posibilidade de negociación coa Xunta". Por este motivo, pediu que CCOO, UXT e ANPE "recapaciten e se descolguen do asinado".

Rectificar todas as etapas

Para mostrar a situación que vive o ensino galego, Arroxo analizou todas as etapas educativas. En Infantil e Primaria, "todo canto se prometía quedou en terra baldía agás as 23 horas lectivas, aínda que sen contar con ningún tipo de reforzo de persoal". Ademais, denunciou que "non se respectaron as ratios nin todo o profesorado de apoio necesario".

Desde a CIG-Ensino lembran eivas como que "hai profesorado especialista na atención á diversidade itinerando entre tres centros, a práctica totalidade dos contratos do Plan Mega son a media xornada e hai prazas insuficientes de atención domiciliara e hospitalaria, tamén en Secundaria".

Precisamente nesta etapa, Arroxo lembrou que "segue mantendo o horario lectivo semanal máis alto do Estado español, mestres que outras comunidades xa recuperaron as 18 horas que sempre tiveron". Alén diso, asegurou que "seguen superándose os 200 estudantes por docente nalgúns casos e, sobre todo, non hai ningunha medida que permita aliviar a complexidade da atención á diversidade".

A respecto da Formación Profesional (FP), Arroxo acusou a Xunta de "privatizala" tal e como "constatou co anuncio do propio Rueda" en relación á proposta de substituír o profesorado contratando profesionais das empresas. Algo semellante indicou en relación ao profesorado de ensinanzas de réxime especial, como as escolas oficiais de idiomas, onde "hai unha maior oferta privada competindo coa pública".

Sobre o anuncio do conselleiro de Educación, Román Rodríguez, de que enviará instrucións aos centros para que manteñan unha "neutralidade ideolóxica", Arroxo afirmou que agardarán a ter o documento na man, mais non consentirán "que introduzan elementos que non estean na lei actual". En caso de non ser así, non descartan acudir aos tribunais.