As cidades do futuro: intelixentes e coas persoas no centro

Ogran obxectivo que perseguen as cidades intelixentes, este novo concepto para desenvolver as urbes a partir de agora, é axudar a cidadanía para dispor, cada vez en maior medida, do ben máis prezado que teñen: o seu tempo. Tempo para gozar, para estar coa familia, para descansar… O ritmo ao que avanzan as tecnoloxías de adquisición e procesamento de datos dificulta en gran medida a organización que este gran fluxo de información require para a súa transformación en coñecemento aplicábel á xestión cotiá. Cada vez obtéñense máis datos da cidade e monitóranse máis variábeis en tempo real sen que nos pararamos para dotarnos da organización necesaria para poder aplicar e aproveitar todas as capacidades tecnolóxicas das que dispomos na actualidade. Termos como Big Data ou a internet das cousas, cada vez máis familiares para a cidadanía, expón, neste sentido, a necesidade de asentar bases sólidas que representen o ecosistema urbano e que permitan orientar a captación e xestión da información cara á utilidade na toma de decisións. Para iso é necesario construír un modelo que recolla, interprete e represente a complexa estrutura de variábeis e interrelacións que poden e deben determinar a estratexia para o seu correcto desenvolvemento. É necesario converter todos estes datos desagregados ou creados e consumidos en compartimentos estancos nun único sistema accesíbel e transversal. Isto permitirá a vinculación entre todos eles, de forma que pasen de ser meramente datos a converterse en información, consumida polos xestores e pola cidadanía que achegará o último elo da cadea: o coñecemento. No escenario actual de evolución das cidades, a toma de decisións diarias convértese nunha tarefa cada vez máis complexa. Diagnosticar correctamente as diversas situacións novas que se dan nela e actuar de forma eficiente e rápida é o gran reto ao que se enfrontan os xestores urbanos. Neste sentido, a chave para tomar boas decisións, non é dispor da maior cantidade de datos posíbeis, senón a capacidade de acceso a calquera deles, e a súa integración e procesamento para convertelos en información significativa de forma que os xestores e técnicos municipais, a través da súa experiencia, convertan esa información en coñecemento. Isto é, facilitar a integración de multitude de fontes de datos, todas elas heteroxéneas, para conseguir unha visión global da cidade e, desta forma, tomar as mellores decisións de forma rápida e efectiva. O uso das novas tecnoloxías para xestionar toda esta complexidade e a súa incorporación á xestión efectiva da cidade é un cambio de paradigma no modelo de xestión da urbe e a base fundamental dun dos grandes obxectivos que teñen as cidades intelixentes, que xa non só é solucionar os problemas que se presentan a diario, senón dispor de todas as ferramentas necesarias para que, a través dunha visión global e en tempo real, se poidan adiantar así a futuros problemas que un sistema eficiente de xestión urbana debe predicir. Con frecuencia téndese a identificar tecnoloxía con intelixencia. Na actualidade, a maioría das cidades contan con numerosas plataformas e sensores que permiten recoller todo tipo de información, en moitos casos, en tempo real. Con todo, só cando esta tecnoloxía está acompañada de cidadáns e xestores capaces de visualizala, entendela, comprendela e utilizala é cando realmente a urbe se converte en intelixente. Neste punto, e achegando como símil o corpo humano, o músculo (xestión de residuos, mobilidade, xestión da auga…) deixa paso ao cerebro (xestión global, administración integrada, indicadores estratéxicos de cidade…). Manuel Meijide é Director de ILUX Visual Technologies