Os casos activos de coronavirus na Galiza camiñan cara aos mil, unha cifra que hai apenas uns días parecía imposíbel de volver a rexistrar. O aumento de 111 casos nas últimas 24 horas, dos que 81 corresponden á área sanitaria da Coruña, fai que xa se superen os 900 casos activos.
A Dirección Xeral de Saúde Pública da Consellería de Sanidade informa que, na última actualización, esta quinta feira, o número de casos activos de coronavirus na Galiza é de 938.
Deles 544 son da área da Coruña (81 máis ca onte), que xa representa case 6 de cada 10 casos que hai no país.
Do total, 93 da a área de Lugo (+9), 60 da de Ourense (+6), 51 da de Pontevedra (+6), 118 da área de Vigo (+2), 43 da de Santiago (baixan 2), e 29 da de Ferrol (+9).
Así pois, os casos activos aumentan en todas as áreas sanitarias galegas agás na de Santiago-Barbanza, onde descende en 2.
Do total de pacientes positivos, 1 están en UCI, 40 en unidades de hospitalización e 897 no domicilio.
Polo de agora, en Galicia hai un total de 11.506 persoas curadas, rexistrándose 623 falecementos. A última persoa falecida foi un varón de 90 anos que estaba ingresado no CHUO e presentaba patoloxías previas.
O número de PCR realizadas é de 272.115.
No que atinxe ás residencias de anciás, hai 5 casos activos, dos que 3 corresponden a persoas usuarias e 2 a traballadores.