O Carballiño prepárase para bater un novo récord ao preparar a tapa de polbo máis grande do mundo, con 580 quilos, 65 máis que na pasada edición.
Segundo informou o Concello, os polbeiros e polbeiras aspiran a volver facer "historia" esta terza feira, 8 de agosto, a partir das 19.30 horas.
Para a elaboración destes 580 quilos de polbo en formato de tapa xigante serán necesarios 45 litros de aceite, 5 quilos de sal e 2 de pemento.
Como cada ano, prevese que sexan centenares de veciñas e veciños e visitantes que acompañen aos polbeiros na súa misión.
A tapa, cun prato de 5,37 metros de diámetro, poderá degustarse ao finalizar a preparación.
A Festa do Polbo
O Carballiño leva xa máis dunha semana celebrando a Festa do Polbo cunha programación que se estenderá até o domingo, 13 de agosto, cando está prevista a gran romaría no Parque Municipal.
