O polbo galego encareceu 72,32% este ano e a Xunta aumenta o tope das capturas

Esta sexta feira comezou a veda da captura do polbo na Galiza que estará en vigor até as 5 horas da segunda feira, 2 de xullo. Ábrese, desta maneira, un período no que non se poderá proceder á extracción desta especie. Por este motivo, a Xunta da Galiza advirte de que queda expresamente prohibida a captura, tenencia a bordo, transbordo, desembarco, almacenamento, venda ou comercalización desta especie, por medio de calquera arte, en augas nas que a Administración galega ten competencias en marisqueo. Poden o polbo, os chocos e as luras garantir a seguranza alimentaria? A frota dedicada á captura deste cefalópodo con nasas, polo tanto, deberá retiralas do seu calado e levalas a porto. O tempo de veda, sinalan, é tamén aplicábel á pesca marítima de recreo e ás capturas con calquera outra arte distinta da nasa para polbo. Co remate da campaña 2022-2023 no país, efectiva desde as 16 horas do 19 de maio, xa se poden consultar os datos que a Consellaría do Mar facilita sobre a súa venda nas lonxas galegas en todo este período. En total, na Galiza vendéronse nelas 2.480.883,50 quilos por un importe de 20.997.245,31 euros. Desde o seu inicio o pasado 4 de xullo de 2022 até fin de ano as vendas representaron 1.310.126,02 quilos, por valor de 11.800.556,68 euros de polbo (Octopus vulgaris). Desde o inicio de 2023 até onte, as vendas foron de 933.470,93 quilos, por valor de 8.558.487,18 euros. No caso do polbo cabezón (Eledone cirrhosa), as lonxas venderon 166.586,05 quilos en 2022 (446.022,93 euros) e 70.700,50 quilos (192.178,52 euros) no que vai de ano. Prezos do polbo nas lonxas galegas En relación ao prezo por quilo nas diferentes lonxas galegas, as cifras sinalan un forte aumento no que ten que ver co seu custo máximo. Así, nese importe, o polbo pasou de venderse de media a 19,15 euros/Kg en 2022 a 33 euros/Kg en 2023. No polbo cabezón as cifras tampouco foron mellores. No seu caso pasou de venderse de media a 6,25 euros/Kg en 2022 a 10,50 euros/Kg en 2023. O San Froilán de Lugo contará con máis de 200 actividades e recuperará as casetas de polbo Porén, os prezos medios quedan ao redor do 9 euros/Kg, no caso do polbo, e en algo máis de 2,6, no do polbo cabezón. Estes importes estarían relacionados cos prezos mínimos, en ambos os dous casos, que se marcaron no seu momento e que oscilaron entre os 0,12 euros/Kg e os 0,40 euros/Kg. A nova campaña que comezará en xullo Este ano, cando abra de novo a campaña, a Xunta anunciou que incrementará os topes máximos de captura fixados no plan en relación coas campañas anteriores. Polo tanto, a partir do 3 de xullo, a cota máxima da especie será de 35 quilos por barco e día, á que se engaden 35 quilos diarios por cada tripulante enrolado e a bordo, até un máximo de 240 quilos por xornada. No resto da campaña, a cota máxima de captura para o polbo será de 55 quilos por embarcación e día, aos que se lle engaden outros 55 por cada tripulante enrolado e a bordo, até un máximo de 350 quilos por xornada de traballo. Ademais, o horario autorizado para a actividade das embarcacións con nasa comezará as 6 horas -aínda que os barcos poden saír do porto ás 5 horas- e finalizará ás 16 horas. O número de nasas permitido quedará estabelecido en función do tamaño da embarcación e do número de tripulantes enrolados e a bordo. Por que a do Carballiño non é a Festa do Polbo xenuína? Polbo foráneo O debate sobre a entrada de polbo foráneo pola falta de produto galego segue vivo e relaciónase directamente coa gran demanda que segue a ter na Galiza, unha situación que tamén influiría nos prezos. Os maiores produtores mundiais son a China, Marrocos, Mauritania e o Xapón. Xuntos representaban 76% da produción mundial desta especie en 2017, apunta o Observatorio Europeo do Mercado dos Produtos da Pesca e a Acuicultura (Eumofa). Este mesmo organismo aseguraba que o Estado español estaba, con Italia, entre os membros da Unión Europea con máis importacións de polbo "principalmente conxelado". En 2022, o feche do mercado marroquí e o pouco produto procedente de Mauritania provocou a súa falta, segundo o sector que traballa con el. Agora, na hostalaría comezan a prepararse para este tempo en que o polbo galego chegará ás lonxas. É o caso da polbaría Guerra. O seu responsábel recoñece que “hai moi pouco polbo na nosa terra e, digan o que digan ao final chega a nós desde Marrocos, Mauritania e máis sitios”. Comeza a tempada do polbo na Galiza Porén, considera que “hai polbo bo e polbo malo tamén neses países” e cre que "a veda non chegará a prexudicar o seu consumo". Entende que “quen comercialice exclusivamente polbo das rías galegas seguro que estará afectado” pola situación, "polo menos até que remate a veda", mais non é o seu caso. "Nós temos de fóra e tamén de aquí", admite. Ademais, ten a seguridade de que ante a veda xa se realizou unha provisión polo que “as cámaras frigoríficas nestes momentos teñen moito produto conxelado” como para que non falte en todo o ano. Variedade de prezos nas feiras En Arcos, a parroquia de máis sona no Carballiño, unha das súas polbeiras, Luz, leva 16 anos no sector. Traballa nas feiras e tamén en eventos privados, unha posibilidade que nos últimos anos colleu moita aceptación na Galiza. Recoñece que os prezos da ración varían segundo os municipios aos que se despraza. “Aquí, no Carballiño, témolo a 10 euros cando na zona de Vigo está en 12 euros”, sinala. A razón destas diferenzas fundaméntase, segundo esta polbeira, “sobre todo polos desprazamentos e os custos que medraron co aumento do combustíbel, butano e aceite”. Pola contra, no seu propio concello mantense baixo como consecuencia de non ter que viaxar e o feito de coincidir nel “un número maior de polbeiras”. A Academia Galega non acepta “pulpo” como palabra “normativa” No caso dos postos que venden polbo e outros alimentos, ademais de contar con mesas, tamén varía o prezo mais por outras razóns. Juan, responsábel da polbaría Guerra, traballa as comarcas de Compostela, Terra de Montes Pontevedra. Explica a Nós Diario que os prezos da ración “oscilan entre os 12 e os 14 euros, mais comentáronme que en Santiago, pola Ascensión, chegaron a 15 euros”. Nos gastos, no seu caso, inflúe máis o aluguer do terreo “que pode ir dos 3.000 euros aos 4.000 euros”.