Cambados perderá 70 prazas de maiores e 30 postos de traballo antes de que acabe o ano, denuncia CCOO
Cumpríronse "os peores agoiros", lamenta Comisión Obreiras. O sindicato denuncia a perda de 70 prazas residenciais e 30 postos de traballo en Cambados (O Salnés) ao se confirmar o feche do asilo que hai no municipio, de xestión privada, "antes de que acabe o ano".
A congregación relixiosa que xestionaba as instalaciónspuxo á venda o pazo de Montesacro por uns tres millóns de euros.
Segundo sinala nun comunicado, a "inacción" de Concello, Deputación de Pontevedra e Xunta da Galiza favoreceu este desenlace, xa que "foron incapaces de sentarse para atopar solución a este gravísimo problema social". "Especialmente preocupante", engade CCOO, é a "absoluta inhibición" da Consellaría de Política Social, departamento con con competencias directas nesta materia.
O sindicato advirte que o persoal da residencia rematará 2024 "no desemprego", mentres que as cincuenta persoas usuarias dese centro de maiores serán repartidas pola xeografía galega en diferentes centros da congregación relixiosa que xestionaba as instalacións, concretamente localizadas no pazo de Montesacro, á venda desde o ano pasado por uns tres millóns de euros.
Comisións Obreiras asegura que procurou activamente unha saída á situación. Solicitou reunións coas diferentes administracións, mais só o Concello de Cambados accedeu a unha xuntanza, mentres que a Deputación de Pontevedra e a Xunta da Galiza "deron a calada por resposta", censura o sindicato. CCOO afirma descoñecer que "escuros intereses" se agochan tanto detrás da orde que xestiona o centro "á que se lle supón un fin social", lembra, como das diferentes administracións implicadas, que "non queren dar unha saída digna ás persoas afectadas por este feche".
Residencia pública
"Consideramos que é absolutamente inaceptábel que unha comarca onde residen máis de cen mil persoas e hai número importante de persoas dependentes con baixo nivel de ingresos non teña unha residencia pública", critica CCOO nun comunicado, no que remarca a dimensión social deste problema, que transcende desde hai tempo os límites comarcais da Arousa.
Neste sentido, o sindicato acolle positivamente a proposta do Concello de pór a disposición un terreo para a construción dunha residencia pública e fai un chamamento ás tres administracións implicadas para que se poñan de acordo "en facela realidade canto antes", de xeito que se recuperen as prazas residenciais e os postos de traballo que existen na actualidade na Residencia Nuestra Señora de la Valvanera de Cambados.
