A Atención Primaria, nunha situación límite tras máis dunha década de recortes

Verín volve saír á rúa en defensa da asistencia pediátrica. Precisamente hoxe, a localidade acolle unha manifestación que sairá as 17:00 horas do centro de saúde e que os promotores agardan masiva. Segundo sinala a Nós Diario Aida Rodríguez, unha das voceiras do colectivo Pediatras en Verín xa, “na comarca temos un problema moi gordo tras pedir a baixa un dos pediatras do PAC e xubilarse outro. Así, quedamos cunha única profesional para atender a todas as crianzas do concello pero tamén dos municipios próximos como Cualedro, Laza ou A Mezquita que reciben esta prestación no centro de saúde de Verín”. Rodríguez discrepa das solucións ofrecidas polo xerente da área sanitaria de Ourense e demanda solucións a medio prazo. Neste sentido, lembra que “diante das nosas reclamacións colocaron unha profesional de medicina familiar para reforzar o servizo de pediatría e cando souberon da manifestación reintegraron ao servizo temporalmente a un pediatra que viña de xubilarse. Pero isto non é unha alternativa”. A este respecto, indica que “os recortes nos servizos está a provocar un colapso nas urxencias do hospital de Verín e obrigando a moitos pais e nais a desprazarse 74 quilómetros a Ourense para que atendan as súas aos seus fillos e fillas”. Costa da Morte A situación non é mellor na Costa Morte. Neste caso, a integrante da plataforma en defensa da sanidade publica da comarca e voceira do colectivo Pediatras e matronas xa, Vanesa Viquendi, asegura a Nós Diario que “o servizo sanitario na Costa da Morte é cada día máis precario nos diferentes niveis asistenciais. Se falamos da asistencia pediátrica só contamos cun profesional no centro de saúde de Cee para atender a todos os nenos e nenas da zona. O mesmo sucede co servizo de matronas, cunha soa titulada para atender a todas as mulleres da Costa da Morte”. Viquendi considera que “é o momento de dicir basta e saír a rúa a reclamar unha sanidade pública de calidade”. A este respecto, amósase convencida do éxito da manifestación convocada para o domingo 12 en Compostela e pon como exemplo o alto número de persoas que acudirán da Costa da Morte. Nesta liña, apunta que “xa temos catro autobuses cheos mais o groso da xente vaise desprazar no seu propio automóbil. O ambiente que percibimos de cara a mobilización do domingo nunca o notamos aquí e outro tanto aconteceu coa recollida de sinaturas para a ILP en defensa de Atención Primaria”. Moaña Moaña leva 61 semanas consecutivas mobilizándose en defensa dos servizos médicos. Neste sentido, a alcaldesa da localidade, Leticia Santos, comenta a Nós Diario que “os actos de protesta obrigaron a Xunta a cubrir dúas prazas vacantes de médicos na quenda de tarde pero as urxencias sanitarias continúan sen prestarse”. Nesta liña, recorda que “coa escusa da pandemia levaron o Punto de Atención Continuada (PAC) para Cangas e agora non queren devolvelo malia o prexuízo que xera a veciñanza”. Porén, significa que “o plan funcional do Sergas recoñece a existencia dun PAC en Moaña e imos seguir reclamándoo”. Santos explica que “máis de medio milleiro de moañeses e moañesas estarán o domingo 12 de Compostela. Arredor da metade desprazaranse nos catro autobuses fretados polo concello, que levan días cubertos, pero hai moita outra xente que acudirán no seu vehículo particular ou mesmo en microbuses contratados por grupos de amigos para asistir á manifestación e posteriormente facer unha ruta por algunha parte da Galiza”. Neste sentido, conclúe que “a resposta da xente para esta mobilización está sendo espectacular” Sos Sanidade Publica O integrante de Sos Sanidade Publica, Xosé Dios, está convencido de que “a manifestación será histórica”. A este respecto, destaca a Nós Diario que “nunca antes conseguimos sumar tantas adhesións de fóra e de dentro da comunidade sanitaria, até o punto que a totalidade das xuntas de persoal das áreas sanitarias da Galiza expresaron por unanimidade o seu apoio a esta mobilización así como os colexios médicos”. Na mesma dirección, significa que “temos comprometidos desde a plataforma 160 autobuses para acudir a Compostela desde diversas partes do país”. Dios non gusta de facer previsións de asistencia pero asegura que “imos encher a Praza do Obradoiro de Compostela”. Así, lembra que “nesta manifestación xogámonos moito porque con ela queremos axudar a reverter todos os recortes aplicados durante estes anos e que están a levar a Atención Primaria”. Ademais, crítica “a estratexia da Xunta da Galiza de tentar botar enriba do persoal médico á poboación” e aposta porque “o Goberno galego faga públicas as conclusións do Consello técnico de Atención Primaria que recolle un modelo alternativo para este nivel sanitario actulemnte nunha situación límite”. As principais reivindicacións de Sos Sanidade Publica As reivindicacións da mobilización do domingo, resúmeas Xosé Dios na “necesidade de restabelecer todo o eliminado pola desastrosa e destrutiva mala xestión do PP e introducir medidas urxentes que resolvan todos os problemas actuais , mediante a aprobación dun novo modelo de Atención Primaria, acordado coa participación da poboación e o persoal que traballa nos centrosde saúde”. Dios critica que “continúan os graves problemas de acceso á asistencia sanitaria coa hexemonía da ineficiente consulta telefónica, seguen crecendo as irresponsábeis listas de agarda que poñen en perigo aos pacientes, e aumentan os centros de saúde sen pediatras e sen os médicos necesarios”.Nesta liña, demanda “a recuperación de prazas eliminadas” e a dotación do persoal necesario". O representante de Sos Sanidade Pública denuncia a situación “do persoal sanitario superado pola precariedade, os baixos salarios, a presión asistencial excesiva e as consultas masificadas, que os está obrigado a marchar da Atención Primaria, se esta situación se perpetúa podería supoñer o fin dun modelo de Atención Primaria que ten que ser garantía dunha asistencia sanitaria universal, accesíbel, equitativa ede calidade a toda a poboación galega”.