Apostolos Mangouras, capitán do petroleiro Prestige, afronta penas de sete anos de prisión por delito contra os recursos naturais e o medio ambiente e polo delito de danos tamén se solicita pena de prisión de cinco anos. Diante ten como acusación ao Ministerio Fiscal, a Plataforma Nunca Máis, a Asociación Arco Iris, Izquierda Unida, o Estado español, a Xunta e varias institucións máis.
Chegou cedo pola mañá case ao tempo que a prensa. Entrou, como no caso dos outros dous acusados, por unha das portas traseiras do recinto onde se esta a celebrar o xuízo. Con aspecto canso, polo menos nos cinco minutos que a prensa gráfica tivo acceso á sala, seguiu as diferentes intervencións a través dun sistema de tradución. O seu avogado defensor, José María Ruíz Soroa, presentou a Mangouras como inocente e cargou contra as autoridades que daquela tiñan responsabilidades políticas.
Para a defensa prodúcese unha situación de "indefensión" que ademais cualifica de "inconstitucional"
![Publicidade 196050]()
"As autoridades marítimas españolas adoptaron decisións equivocadas"
A defensa do capitán do buque, Apostolos Mangouras, solicitou a nulidade do mesmo e sinalou que o Prestige tiña todas as certificacións necesarias para a navegación e que a estrutura estaba nun "aparente" bo estado. Apunta que o seu defendido "adoptou as medidas correctas e negouse a tomar remolque". Segundo afirma José María Ruíz Soroa, avogado da defensa, "a partir do día 14 de novembro as autoridades marítimas españolas asumiron o control do buque e adoptaron decisións equivocadas".
Para a defensa prodúcese unha situación de "indefensión" que ademais cualifica de "inconstitucional" en referencia aos artigos 18 e 24 da Constitución española. José María Ruíz Soroa preguntou diante da sala se "España é capaz de darlle un xuízo xusto a Mangouras?". Diante desta pregunta aporta as declaracións do presidente do goberno español nesas datas, José María Aznar, e do ministro de Exteriores nese intre que afirmaran que Mangouras "era un pirata".
Por último afirma que na cualificación xurídica das acusacións non existe dolo posto que, segundo o convenio do dereito do mar, só existiría "nos actos realizados desde buques que se atopen fóra do mar territorial do Estado.
