Xurxo Doval deixará a Dirección das Xuventudes Socialistas antes do verán

Xurxo Doval (Ourense, 2000) deixará este ano a Dirección das Xuventudes Socialistas de Galicia (XGS), que prevén manter o seu congreso antes do verán, coa satisfacción de cumprir o seu deber "orgánico e político" tras incrementar até o "dobre" a cifra de militantes e lograr "marcar o rumbo" do Partido Socialista en asuntos como Palestina ou Altri.

"Logramos que se nos escoitase e fixese caso", explicou nunha entrevista concedida a Europa Press con motivo da súa decisión de deixar a Secretaría Xeral das XSG, que trasladou internamente no último comité nacional do PSdeG, decorrido o pasado sábado en Santiago de Compostela.

Doval, que actualmente se atopa en Barcelona estudando un mestrado de Economía Cuantitativa que compaxina coa preparación da súa tese doutoral en Economía Aplicada pola Universidade de Santiago de Compostela (USC), fixo un balance "positivo" da súa etapa á fronte da organización xuvenil trasladando a súa "satisfacción" tanto no orgánico como no político.

Describe como "catro anos moi intensos" os que estivo á fronte das XSG, a cuxa Secretaría Xeral chegou en 2022 despois que durante os dous anos anteriores a organización xuvenil estivese baixo os mandos dunha xestora que "tivo morta á federación" por, segundo trasladou, as limitacións que lle chegaban de Madrid.

Por iso, asegura que supuxo "empezar desde cero" e "reconstruír a federación coa vista posta nas municipais de 2023". "Entrei para pór a organización a punto e así foi. Vivimos varios procesos electorais, reconstituimos numerosas agrupacións e fixemos de media 20.000 quilómetros pola Galiza", destacou para apuntar que agora, "que empeza a haber máis xente" da que había cando el chegou ao cargo, é o momento de que outras persoas asuman a responsabilidade de liderar a organización.

Neste sentido, destacou que na súa etapa como xefe de filas das XSG a organización viu incrementado en case un centenar o seu número de militantes, que na actualidade oscila entre as 250 e 300 persoas. Ademais, na entrevista, incidiu na necesidade de que "mulleres valentes" tomen un papel protagonista nun momento "no que os discursos machistas están moi ancorados na xente nova, con menores de 25 anos que consideran a violencia de xénero unha ideoloxía política".

"Marcar o rumbo ao PSdeG"

A nivel político, destaca a capacidade da organización xuvenil para introducir nas partido "mensaxes que non estaban moi presentes" como a creación dun banco público de vivenda en aluguer ou un billete único para o transporte público. Tamén se mostra satisfeito de conseguir "marcar o rumbo" ao PSdeG en asuntos como a ocupación de Palestina e o proxecto que a empresa Altri quere desenvolver en Palas de Rei (A Ulloa), unha cuestión sobre a que as XSG debateron e fixaron posición nun comité nacional en 2024.

Aínda que recoñeceu que "foi difícil ir convencendo ao partido", destacou que "aos poucos" foron vendo como "compañeiros e compañeiras se sumaban e que en decembro de 2024 a viceportavoz parlamentaria Lara Méndez acudiu a unha das manifestacións en contra do proxecto que a pasteira propón en Palas de Rei. Tras iso, lembra que o propio Secretario Xeral do PSdeG, José Ramón Gómez Besteiro, participaría nunha manifestación posterior.

Neste punto e preguntado polas críticas que censuraban ausencia de claridade na postura inicial do PSdeG sobre Altri, rexeitou que se deba a unha falta de valentía e atribuíuna á condición de partido de Goberno no Estado. "Eu tento ser comprensivo, mais tamén penso que o noso poder territorial reside no noso propio territorio. Non podemos esperar que caia de arriba, de Madrid", dixo.

Doval defendeu que "se hai boa relación entre as mocidades e o partido, se hai puntos de acordo, sempre lle vai a ir ben ás dúas organizacións". Neste punto, puxo en valor que os dous secretarios xerais do PSdeG cos que coincidiu na súa etapa á fronte das XSG, Valentín González Formoso e José Ramón Gómez Besteiro, tivesen "vontade" para que iniciativas das Xuventudes Socialistas "saísen adiante".

Ve o debate sobre os casos de acoso "resolto"

Na entrevista e preguntado pola crise que se abriu no PSdeG polos casos de acoso denunciados na canle interna habilitada polo PSOE, Doval sostén que é un debate que "quedou resolto" a pasada fin de semana no comité nacional, no que a formación socialista abordou o asunto e tras o que o partido manterá unha Conferencia Feminista e formará en feminismo os seus cargos orgánicos e institucionais.

"Dixéronse as cousas que se tiñan que dicir e onde se tiñan que dicir", sostivo para apelar a que os debates se produzan "dentro do partido" aínda que "ás veces custe un pouco". Nesta cita interna, varias das persoas integrantes das XSG apelaron ao partido a non desilusionar a mocidade.

Preguntado sobre as recomendacións que lle fai á formación para que isto non ocorra, Doval insiste na necesidade de que o PSdeG visibilice á súa organización xuvenil e subliña que "un discurso do partido entra mellor na xente nova cando hai xente nova que o pode transmitir, sexa onde sexa".

Neste punto e preguntado pola falta de mozas nos cargos institucionais, avoga por un "equilibrio xeracional" nas listas e subliña que "onde hai vontade" para que os mozos e as mozas estean presentes "nótase" e pon como exemplo a Agrupación do PSdeG na cidade de Ourense e o grupo municipal nesta urbe.