Os novos orzamentos da Xunta fican 1.695 millóns por baixo das contas do bipartito en 2009

A Xunta afronta a recuperación económica cun investimento inferior ao de hai 12 anos. O orzamento "máis alto da historia", segundo dixo Núñez Feixoo, fica 1.695 millóns por baixo do último elaborado polo Goberno de PSdeG e BNG, que ascendía en 2009 a 11.426 millóns, que equivalerían hoxe, atendendo o IPC, a 13.322 millóns.
O novo conselleiro de Facenda, Miguel Corgos, presentou os orzamentos para 2022 (Foto: Xunta da Galiza)
photo_camera O novo conselleiro de Facenda, Miguel Corgos, presentou os orzamentos para 2022 (Foto: Xunta da Galiza)

O Goberno galego presentou o proxecto de contas da Xunta para 2022 afirmando que son as “máis altas da historia”. O presidente, Alberto Núñez Feixoo, e o novo conselleiro de Facenda, Miguel Corgos, revelaron na rolda de prensa posterior ao Consello da Xunta que a Galiza terá para o ano que vén un orzamento non financeiro de 11.627 millóns de euros. Porén, o poder da matemática desmonta mais unha vez o clásico slogan "das cifras máis altas da historia".

De feito, o orzamento non financeiro do ano 2009, o último elaborado polo Goberno de coalición de PSdeG e BNG na Xunta, e antes por tanto da chegada de Alberto Núñez Feixoo a San Caetano, alcanzaba os 11.426,4 millóns de euros (o total do orzamento consolidado naquel ano alcanzou os 11.792,8 millóns).

Se á primeira cifra, a do orzamento non financeiro de 2009, se lle aplica a suba do Índice de Prezos de Consumo (IPC) desde outubro de 2009 a setembro de 2021 (hai 16,6% de variación do IPC na Galiza, lixeiramente por riba da media estatal, que é de 16,2%) os orzamentos de 2009 equivalerían na actualidade a 13.322 millóns de euros, é dicir, 1.695 millóns máis que as contas da Xunta para 2022. Desta maneira, o Executivo galego pretende afrontar a recuperación económica con 1.695 millóns de euros menos dos que se orzaron en 2009. 

Capacidade de gasto para o ano 2022

Feixoo e Corgos celebraron esta segunda feira, 18 de outubro, que o novo orzamento "rompa" o teito de gasto non financeiro estabelecido para o ano 2022 (11.571 millóns de euros) grazas ás achegas que recibirá a Galiza e "que non se coñecían" en agosto, cando foi aprobado polo Parlamento. Efectivamente, as novas contas superan en 1.204,8 millóns o teito de gasto do ano que vén, mais fican uns 20 millóns por baixo do teito estabelecido no exercicio 2021 (11.644 millóns). De feito, o teito aprobado para 2022 é 93 millóns de euros inferior ao de 2021.

Por outra banda, o orzamento non financeiro anunciado para o ano que vén (11.627 millóns) si supera o actual (11.563 millóns) sen atender claro está ao engadido de 101 millóns en crédito para financiamento empresarial que se incorporou ás contas de 2021 (101 millóns a maiores). Aínda fica pendente coñecer nos vindeiros días a canto ascenderá a parte financeira para o ano que vén.

Gasto social 

Na rolda de prensa Feixoo cifrou en "máis de sete" de cada 10 os euros que as contas públicas dedicarán a financiar o gasto social.
Segundo afirmou, as partidas para esta materia alcanzan 8.660 millóns, cun incremento de 610 respecto aos anteriores orzamentos: 269 dedicados ao reforzo en sanidade (que se sitúan nun total de 4.583 millóns), 179 á educación (en total 2.695 millóns), 126 ás políticas sociais (987 en total) e 37 ao emprego (395). Son as contas "da reactivación e a recuperación", aseverou o titular da Xunta, que se valeu dunha expresión do recentemente falecido Valeriano Martínez, anterior conselleiro de Facenda, ao falar do "crecemento san" que supón reducir a partida destinada aos intereses da débeda até os 74,1 millóns. É, reivindicou Feixoo, "a única que baixa" de todo o orzamento -en 2021 alcanzaba 99,7 millóns-.

De "realista e prudente" cualificou o presidente o cadro macroeconómico, que revisa á alza o crecemento para este exercicio, até 6%, o mesmo que estima para 2022 tras unha baixada de 8,9% en 2020. En canto ao desemprego, sitúao en 12,2% a finais de ano e en 11,7% ao acabar 2022.

Por capítulos de gastos, os investimentos reais ascenden no proxecto do exercicio que vén a 1.441,9 millóns, 10,3% máis e as transferencias de capital sitúanse en 1.12,5 millóns, polo que o total de gastos de capital ascenden a 2.554,5 millóns, 14,6% máis.
No caso do emprego público, Corgos subliñou partidas de 84 millóns para facer efectivo o incremento salarial de 2% ao funcionariado. Sinalou a previsión de dotación de 1.330 prazas nos cadros de persoal das institucións sanitarias públicas, entre as que a Xunta resalta 501 prazas de persoal facultativo, 479 prazas de enfermaría e 162 para persoal residente en formación.

No ámbito do financiamento municipal, o novo proxecto de contas contempla 488,6 millóns, deles 147 correspondentes a mecanismos de cooperación local e 341,6 a outras transferencias a entidades locais. É "a maior achega da historia para as entidades locais", segundo a Xunta.

Por último, no relativo a universidades, o plan de financiamento estará dotado de 469 millóns de euros, fronte aos 444 de 2021.

As contas de Martínez, a debate

O proxecto de orzamentos para 2022 entrará na cuarta feira, 20 de outubro, no Parlamento galego para a súa tramitación coa previsión de que estean en vigor a 1 de xaneiro. Son as contas "de Valeriano Martínez e o seu equipo", dixo o presidente da Xunta da Galiza, Alberto Núñez Feixoo, con referencias emocionadas ao falecido titular de  Facenda. Igualmente, o seu sucesor, o xa ex director xeral de Orzamentos, Miguel Corgos, que esta seguda feira xurou o cargo como titular de Facenda, tivo palabras de recordo para Martínez, que morreu no seu despacho o pasado 6 de outubro. Os orzamentos estaban "finalizados" e só houbo que facer "algúns axustes", destacou.

Na tarde deste 18 de outubro, Feixoo xunto ás conselleiras e conselleiros e o presidente do Parlamento galego, Miguel Santalices, entre outros representantes políticos, participaron nunha misa por Martínez na Catedral de Santiago de Compostela. 

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios