Un total de 29.300 galegos e galegas residentes no estranxeiro votaron nestas eleccións galegas de 2024, o que supón 6,15% dos 476.514 que forman parte do Censo Electoral dos Residentes Ausentes (CERA). Estes sufraxios, que non se coñecerán até o día 26, non terán incidencia na maioría absoluta do PP. Tan só na circunscrición de Ourense os 'restos' do último escano terminaron igualados, cun PSdeG que quedou a 112 votos de arrebatar un deputado aos populares.
Na Coruña, o último deputado electo, que foi do BNG, está a unha distancia a de 9.511 votos sobre o PSdeG. En Pontevedra, o último escano en xogo foi para o PP, que lle quita tamén unha distancia importante ao PSdeG para poder cambialo, de 6.450 sufraxios. No que se refire a Lugo, este deputado final elixido, do BNG, conta cunha distancia algo menor, neste caso ao redor de 3.000 votos respecto ao PSdeG.
Os resultados deste voto, que por primeira vez despois de tres comicios galegos non foi 'rogado', daranse a coñecer o 26 de febreiro. No 2020 votaran 5.404 persoas (1,17%); en 2016, 10.777 (2,41%); e en 2012, 12.954 (3,26%). Mentres, en 2009 depositaran o seu voto no estranxeiro 101.708 electores, un 30,2% do total.
Nas últimas eleccións estatais na Galiza, decorridas en xullo de 2023, primeiras sen voto 'rogado' nos últimos anos, o PP foi primeira forza e o PSdeG quedou de segundo nas catro provincias.
O director xeral de Emerxencias, Santiago Villanueva, informou este domingo dos datos do voto exterior, nunha rolda de prensa no Centro de Datos da Xunta instalado en San Caetano.
Polo momento descoñécese o voto do estranxeiro debullado por circunscricións. En todo caso, a circunscrición da Coruña é a que rexistra un maior número de electores CERA, con 164.8421; seguida de Pontevedra, con 138.182; Ourense, con 103.832; e Lugo, con 69.658.
En canto ao 'top cinco' de países, segundo o número de potenciais electores que residen no estranxeiro, Arxentina segue á cabeza con moita diferenza, xa que computa 166.289. Séguenlle Cuba e Brasil, onde se superan os 45.000. Mentres, Uruguai computa 37.165; e Suíza, o primeiro país alleo ao continente americano no ranking, 34.114.
