A esquerda, o feminismo, a solidariedade internacionalista, a defensa da terra e o medio ambiente, o combate contra o colonialismo, o rexeitamento do racismo, da xenofobia, do fascismo. “Todas as causas xustas” collen no nacionalismo galego, defende o BNG no vídeo que vén de lanzar. "As súas causas, a nosa causa. Elas e eles, o noso exemplo" é o final lexendado do vídeo.
Un traballo no que saen figuras históricas do nacionalismo galego como Bóveda, Castelao, Díaz Baliño, Anxel Casal, Mocho Reboiras, Elvira Bao ou María Miramontes así como figuras destacadas do feminismo, Simone de Beavoir, Clara Zetkin ou Begoña Caamaño.
A loita contra o colonialismo está representada nas imaxes de Amícal Cabral, Tomas Sankara, Arafat ou Frantz Fanon; e as de Che Guevara ou Salvador Allende mostran a aposta noutra esquerda posíbel. Ademais reflexa as loitas contra as discriminacións raciais e sexuais, Nelson Mandela, Marielle Franco, Rosa Parks e representantes dos movementos soberanistas, Lluís Companys, o lehendakari Agirre ou James Connolly.
O BNG quere destacar o carácter internacionalista, aberto e solidario do nacionalismo galego como foi concibido desde As Irmandades e hoxe máis que nunca, afirma o responsable de Comunicación do BNG, Xavier Campos, “pensando nunha Galiza como célula de universalidade”.