Pedro Sánchez amosouse convencido dun cambio político na Galiza. Na súa intervención no acto de apertura da conferencia política do socialistas asegurou que 2024 “vai ser o ano do cambio na Galiza” da man.
Sánchez sinalou que o próximo ano “haberá cambio, teremos novo presidente” na Xunta da Galiza que permitirá a coordinación co Goberno español para “facer avanzar Galiza”.
O presidente do Executivo estatal significou que a súa formación representa á “Galiza que avanza con ganas” e que “non se resigna, non quere máis prórrogas nin máis momentos de parálise, de resignación e de falla de compromiso social”.
O mandatario español aproveitou a súa presenza no acto político dos socialistas galegos para pór en valor o labor do seu Goberno. Neste sentido, expresou o seu compromiso coa chegada do AVE da Galicia e coa mellora da rede de distribución da enerxía eléctrica.
Gómez Besteiro
O candidato socialista a Presidencia da Xunta da Galiza, José Ramón Gómez Besteiro, que precedeu na súa intervención a Sánchez, afirmou que “chegou o momento de que a dereita perda para que Galiza gañe, e non me conformo só con gobernar: quero gañar”.
Gómez Besteiro asegurou que a conferencia política “é unha mensaxe alta e clara do socialismo galego ao noso país: estamos listos e preparados para gañar as vindeiras eleccións”. Neste punto, explicou que “chegou o momento de camiñar nós e darlle a Galiza o impulso que merece”.
O responsábel do PSdeG afirmou que “xa estamos aquí! Vaia se estamos aquí, porque Galiza precisa de nós, das e dos socialistas (...) estamos hoxe aquí, porque non asumimos a apatía como forma de goberno e a inercia coma folla de ruta”.